Por Rubén Bastón | Vigo | 22/11/2013
Moi resumido: tiñan unha gran inquedanza e moi poucos cartos. A idea é Elelelos: músicas de tradición oral no Concello de Bueu. Un dobre cedé no que o primeiro serán 80 minutos de recollas de campo de todos os rincóns de Bueu; e o segundo, 12 pezas reinterpretadas polo grupo.
Plantexámoslle o proxecto a Verkami, unha das plataformas de crowdfunding máis coñecidas a nivel español. E aceptouno. Plena transparencia. 40 días, límite de campaña. Se non chegas ao mínimo que dis precisar, non che dan nada. Verkami queda cun 5% de todo o que os mecenas dan. E o banco, outro 1,35%. As cartas sobre a mesa. Gústame.
Retrouso marcou o seu obxectivo inicial en 1.600€, a cantidade que si ou si precisaban para ir adiante. Superou esa cifra nunha semana. Marcou como segundo obxectivo 3.600€, o valor total do que lle custaba o disco. Aos 10 días pasara de 2100€. E ten ata o 17 de decembro de 2013.
Hai quen di que nun país que funcionase correctamente, un proxecto como Elelelos tería saído en base a unha axuda pública, pois é en moi boa parte dixitalización e difusión de música tradicional galega. Sexa como for, toca cambiar a mentlidade. Temos que buscarnos as castañas. E o bo é que a sociedade galega está preparada para ese cambio.
Nos primeiros días, máis de 100 persoas compartiran a ligazón a Elelelos no Facebook. A corrente de opinión xenerada foi tan positiva, que houbo quen se achegou para facer contribucións offline. A xente quere axudar, está no ADN da Internet social. Se lle dás as canles axeitadas, confía en ti, aposta polas cousas ben feitas.
No caso de Elelelos, estou orgulloso de dicir que están a superar as nosas expectativas. E isto non significa máis que hai unha demanda latente en Galicia para proxectos semellantes. Espero que, sen termos sido os primeiros, teñamos aberto unha pequena vía para que outros colectivos modestos como Retrouso se decaten de que o seu potencial só ten un límite: aquilo que poidan soñar.
Nós, se pasamos dos 3.600€, xa temos o noso seguinte soño: poder facer un videoclip.