Estradas cortadas, inundacións e danos en viñedos tras as fortes treboadas de Lugo e Ourense
As fortes treboadas deixaron un reguero de incidencias nas provincias de Lugo e Ourense, especialmente pola abundante caída de sarabia en puntos como Chantada ou as intensas choivas rexistradas na cidade das Burgas.
Por Europa Press / Redacción | SANTIAGO DE COMPOSTELA | 16/06/2021 | Actualizada ás 21:10
A treboada que azouta a Galicia este mércores deixou un reguero de incidencias nas provincias de Lugo e Ourense, especialmente pola abundante caída de sarabia en puntos como Chantada ou as intensas choivas rexistradas na cidade das Burgas.
A sarabia complicou a circulación no corredor cara a Escairón, concretamente na zona de San Fiz, e provocou importantes estragos nos viñedos.
A Policía Local tivo que cortar temporalmente o corredor que conecta Chantada con Monforte debido á acumulación de xeo, que esnaquizou a práctica totalidade das viñas da zona. No entanto, a circulación retomouse aos 15 minutos.
Precisamente, a sarabia concentrouse especialmente no centro da provincia de Lugo, con algúns puntos de pedrazo. De feito, as choivas destacaron especialmente no municipio de Bóveda, onde se chegaron a acumular os 37,7 litros por metro cadrado.
Con todo, os efectos das precipitacións máis intensas rexistráronse en Ourense, con regueros de incidencias debido ás inundacións de locais, garaxes e baixos comerciais e vías alagadas por toda a cidade, ademais de desprendementos de rocas nalgunhas estradas.
As choivas notáronse especialmente a partir das 18,25 horas, cunha acumulación de 23,6 litros por metro cadrado, e as redes sociais enchéronse de vídeos e imaxes do casco antigo das Burgas completamente alagado.
Así mesmo, a treboada deixou polo menos 2.268 raios ao longo desta xornada, especialmente entre as 14.00 e as 18.00 joras, que caeron sobre todo no sur da provincia de Lugo e o norte de Ourense.
