CIG denuncia que a nova Lei de FP potencia "a privatización" ao reforzar e ampliar o papel da empresa

O sindicato CIG-Ensino denunciou que o anteproxecto de Lei de FP, aprobado a pasada semana polo Consello de Ministros, amplía o papel que xoga a empresa e reforza o seu peso nestes ensinos, polo que potencia "a privatización" do sistema educativo. Segundo recolle o texto actual, o Goberno de Pedro Sánchez pretende que as empresas poidan impartir entre un 20% e un 40% do currículo e estender o modelo dual a toda a Formación Profesional, desde a 'Básica' ata os ciclos medios e superiores.

Entre outras implicacións, advirte a CIG, a estrutura formativa da administración educativa estará "condicionada totalmente" ás necesidades e decisións das empresas, cun reforzo da estancia do alumnado nelas, maior control no currículo, ou coa entrega de parte da avaliación entregada a titores designados por ela, entre outra cuestións.

Así mesmo, o sindicato teme un "importante recorte de profesorado" ao estenderse a carga de formación relativa á estancia nas empresas e á posibilidade de que estas poidan formar aos seus propios traballadores para obter títulos oficiais, o que relegaría aos docentes a avaliadores de resultados e "nun lugar secundario".

O anteproxecto, por outra banda, "rectifica parcialmente" o problema provocado coa extinción do corpo de Profesorado Técnico de FP no articulado da Lomloe, abrindo a súa integración e creando o corpo de Especialista en sectores singulares. A CIG avanzou que presentará emendas ao texto para tentar introducir melloras nos apartados relacionados cos docentes, posto que as rectificacións "son insuficientes". Así mesmo, remitirá as propostas aos diferentes grupos parlamentarios para a súa consideración durante a fase de negociación no Congreso.

Arquivo - Prácticas de FP. GVA - Arquivo | Fonte: Europa Press