Por E.P. | SANTIAGO DE COMPOSTELA | 29/06/2021 | Actualizada ás 13:58
Un total de 22 centros galegos que imparten oferta de FP incorporarán aulas de emprendimiento o próximo curso, unha iniciativa que busca potenciar a calidade da formación que se ofrece nestes ensinos a través da iniciativa emprendedora do alumnado.
A Xunta acaba de resolver a primeira convocatoria para impulsar a creación destes espazos a través dos que se profundará na súa intención de estreitar o vínculo entre Formación Profesional e empresa, como vía para "dar un valor engadido á preparación" dos estudantes.
Estas actividades desenvolveranse en estreita relación coa rede de viveiros do programa EduEmprende. Así, permitirán ao alumnado contar cun soporte administrativo, técnico e de infraestruturas nas primeiras fases dun proxecto emprendedor, similar ao marco de desenvolvemento dunha 'startup'.
Para iso, os centros participantes proporcionarán un sistema de orientación, guía e tutorización das ideas emprendedoras achegadas polo propio alumnado, especialmente o que está próximo a finalizar os seus estudos. Se o proxecto alcanzase un nivel de madurez suficiente para a súa posta en marcha e requirise dun espazo para o seu desenvolvemento, desde a aula faranse as xestións necesarias para a súa integración nun viveiro da Rede de viveiros de empresa en centros educativos da Xunta.
RELACIÓN DE CENTROS
As aulas desenvolveranse no CIFP Imaxe e Son, o CIFP Paseo das Pontes, o CIFP Someso, e o IES Urbano Lugrís da Coruña; no IES Monte Neme de Carballo; o CIFP Rodolfo Ucha Piñeiro e o CIFP Leixa de Ferrol; o IES Terra de Trasancos de Narón; O CFP Fraga do Eume, de Pontedeume; o CIFP Coroso de Ribeira; o IES Félix Muriel de Rianxo e o IES Maximino Romero de Lema, de Zas.
O resto situaranse no CIFP Politécnico de Lugo, o IES de Foz, o IES A Pinguela de Monforte, o CIFP A Carballeira-Marcos Valcárcel, e o CIFP Portovello de Ourense; o IES O Ribeiro de Ribadavia; o IES Vilamarín; o CIFP A Xunqueira e o CIFP Carlos Oroza de Pontevedra; e o CIFP Manuel Antonio de Vigo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.