Só en 16 portos dos 122 de titularidade autonómica seguirá prohibida a pesca deportiva

Os afeccionados a esta actividade poderán realizala en 28 dársenas sen limitacións e en 78 con espazos indicados.

Por Europa Press / Redacción | SANTIAGO DE COMPOSTELA | 06/07/2021 | Actualizada ás 12:50

Comparte esta noticia

Só en 16 portos dos 122 de titularidade autonómica seguirá prohibida a pesca deportiva cando, "nas próximas datas", se publique e entre en vigor a resolución redactada por Portos de Galicia para compatibilizar esta actividade cos outros usos das dársenas. En concreto, o texto atópase en "fase moi avanzada de tramitación", segundo destacou a presidenta do ente público, Susana Linguas.

Diso informou na comisión de pesca do Parlamento, a preguntas do deputado popular José Manuel Balseiro. Linguas, que se expresou en castelán, provocou unha queixa por parte do grupo do BNG, quen lembrou que a lei de normalización trata de fomentar o uso do galego mediante a súa utilización polos representantes públicos nas institucións.

Pola súa banda, a presidenta de Portos sinalou que o organismo que dirixe leva "meses traballando nunha modificación normativa que permita integrar" a pesca deportiva, "procurando levantar a prohibición en determinadas instalacións" e tras solicitude "expresa" do interesado. Será "en superficie" e "nunca submarina", segundo precisou.

"GARANTIR A NON INTERFERENCIA"

Ademais, Linguas indicou que a resolución que está previsto publicar nas próximas semanas dará "sempre" prioridade "á seguridade e á actividade profesional" e buscará "garantir a non interferencia".

Entre os 28 portos libres de toda restrición atópanse algúns como os de Rinlo, Bares, Perbes, Santa Cruz, Ézaro, Taragoña e Covelo. Pola súa banda, entre os de prohibición total, están outros como Ares, Redes, Testal, Sanxenxo, Raxó.

Imaxe recurso pesca deportiva - El Español
Imaxe recurso pesca deportiva - El Español

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta