O modelo híbrido chega a Primaria: 8 de cada 10 colexios galegos combinarán libros e dixital en 5º e 6º

Preto do 82% dos 597 colexios e institutos galegos adheridos ao programa ‘E-Dixgal’ incorporan este curso libros de texto en 5º e 6º de Primaria, instaurando por primeira vez o modelo híbrido nestes cursos. Con todo, só dous de cada tres centros optan polo máximo permitido, que son tres manuais. Na ESO, onde xa existía esta posibilidade, un 87% dos institutos aposta polo híbrido e máis do 70% escolle dous libros en papel, situando a porcentaxe conxunta de implantación no 84%.

A Consellería de Educación destacou que a maioría dos manuais seleccionados corresponden a materias básicas. En Primaria, destacan Matemáticas (245 centros), Lingua Galega e Literatura (240) e Lingua Castelá e Literatura (180). En Secundaria, as máis habituais son Lingua Galega e Lingua Castelá, cunha media de 70 centros por materia e curso. O conselleiro Román Rodríguez visitou o Colexio Monte dous Postes, en Santiago, para presentar estes cambios.

Como novidade, este curso establécese un sistema de axudas para a compra de libros. O fondo de préstamo, dotado con 2 millóns de euros, beneficiará a 36.109 alumnos con rendas de ata 10.000 euros per cápita, cun total de 47.521 libros adquiridos. Para rendas de entre 10.000 e 30.000 euros, introdúcese unha nova desgravación fiscal do 15% do gasto en libros e material escolar, ata un máximo de 105 euros por alumno, aplicable na declaración da renda de 2026.

Rodríguez salientou que ‘E-Dixgal’, en marcha desde hai máis dunha década, contribuíu a mellorar a competencia dixital do alumnado, aínda que recoñeceu a polémica xerada arredor do modelo, que motivou a súa reformulación. Ademais, aproveitou para felicitar os tres representantes galegos no campionato europeo de FP Euroskills, que se celebrará en Dinamarca do 10 ao 13 de setembro, con máis de 600 mozos de 33 países en competición.