Por E.P. | SANTIAGO DE COMPOSTELA | 06/07/2021 | Actualizada ás 18:42
A oferta de emprego realizada por empresas en Galicia en 2020 descendeu un 17% en comparación co anterior ano, segundo un informe realizado por Adecco.
Este descenso supón o terceiro menor entre comunidades, cun retroceso que alcanza de media no país o 41,9% nun ano marcado pola pandemia. Un esborralle que alcanzou o 70% nos meses do confinamento.
De tal forma, o 3,1% das ofertas de emprego que se publican no país xéranse na autonomía galega. Supón o oitavo lugar na clasificación autonómica de xeración de ofertas de traballo.
A Coruña aglutina o 41% das ofertas, seguida de Pontevedra (o 35,7%). A máis distancia Lugo (12,1%) e Ourense (11,2%).
Por sectores, comercio ascende unha posición e sitúase como o sector que maior oferta de emprego acapara en Galicia (+9,9%), tras a caída de hostalaría e turismo (-7,7 puntos porcentuais), o sector máis prexudicado pola covid-19.
En canto a volume de oferta refírese, sanidade e ensino/formación foron dúas dos sectores máis beneficiados pola pandemia: ambos teñen unha relevancia maior na distribución sectorial de Galicia que no resto de España.
Por perfís, o posto de traballo máis demandado na comunidade galega foi o de comercial (7,66%). O segundo lugar ocúpao o de operario (4,98%) e o terceiro é o de mozo de almacén (4,57%).
Nin empresas nin profesionais se mostran aínda moi optimistas coa evolución do emprego nos próximos meses. Aínda que un 39,4% das empresas consultadas prevé facer contratacións neste 2021, no caso dos autónomos, esa porcentaxe redúcese ao 3,4%. Ademais, un 47% das persoas con emprego cre posible quedar sen traballo durante 2021 pola crise.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.