Un incendio calcina un piso completo en Boiro, pero non houbo feridos
Sufocado outro lume supostamente intencionado nunha vivenda en Padrón, precintada porque polos danos non podía ser habitada.
Por E.P. | Santiago de Compostela | 09/07/2021 | Actualizada ás 10:37
Un incendio rexistrado nunha casa situada na parroquia de Abanqueiro, no municipio coruñés de Boiro, calcinou un piso completo e fixo ceder o teito do domicilio, pero non houbo feridos. Segundo relatou o 112 Galicia, o lume iniciouse sobre as 19,45 horas deste pasado xoves, nunha casa do lugar de Graso, no concello coruñés de Boiro.
Un particular avisou ao 112 Galicia de que lle ardía a casa e, ao mesmo tempo, outra persoa tamén se puxo en contacto co Centro Integrado de Atención ás Emerxencias para indicar que vía saír fume dunha vivenda no mesmo punto. Por iso, os operadores do 112 avisaron aos Bombeiros de Boiro, ao Servizo Municipal de Protección Civil, á Garda Civil, á Policía Local e a Urxencias Sanitarias de Galicia-061.
A maiores, a petición dos Bombeiros de Boiro, tamén foron informados os Bombeiros de Ribeira, por se fose necesaria a súa intervención. Posteriormente, sobre as 20,15 horas, os servizos de emerxencia confirmaron ao 112 Galicia que a situación estaba controlada e que se viu afectado o teito, que era de madeira e colapsou.
Ademais, indicaron que a vivenda estaba habitada pero non houbo que lamentar danos persoais. Pouco máis tarde, os Bombeiros deron por extinguido o lume que calcinou o piso superior da vivenda, de dúas plantas, e o teito. Por último, para garantir a total seguridade, decidiron precintar a casa para que non accedese ninguén, xa que o lugar non estaba seguro.
LUME EN PADRÓN
Por outra banda, na tarde deste xoves pasado o 112 Galicia tamén tivo coñecemento dun incendio nunha vivenda de Padrón, concretamente, no lugar de Bascuas. Precisamente, foi a propia persoa á que lle afectaba o lume a que se puxo en contacto co CIAE-112 Galicia para informar de que lle ardía unha habitación.
Con estes datos, os xestores do 112 Galicia puxeron os feitos en coñecemento do GES de Padrón, da Policía Local, da Garda Civil e dos Bombeiros de Boiro. Pasadas as 00,00 horas, os efectivos do Grupo de Emerxencias Supramunicipais de Padrón comunicaron ao 112 que, debido ao lume, se viron afectadas dúas habitacións, que arderan por completo.
Segundo confirmaron os profesionais desprazados ata o punto, o lume puido ser intencionado e a vivenda quedou precintada pola Policía xa que, tras os danos provocados polo incendio, non podía ser habitada.
