Por Europa Press / Redacción | SANTIAGO DE COMPOSTELA | 14/07/2021 | Actualizada ás 10:43
O índice de prezos de consumo (IPC) subiu un 0,6% en xuño en Galicia en relación ao mes anterior e a súa taxa interanual segue no 3,3%, a mesma que maio, segundo os datos que publica este mércores o Instituto Nacional de Estatística (INE).
Esta inflación é superior á media española (2,7%). Entre comunidades, o repunte interanual galego do IPC só está por detrás de Castela-A Mancha (3,4%). Á evolución dos prezos en xuño contribuíu, principalmente, o encarecemento da electricidade e dos alimentos e o feito de que os paquetes turísticos e as gasolinas subisen menos este mes do que o fixeron en 2020, explica o Instituto Nacional de Estatística.
A taxa galega é a maior en catro anos, xa que non se alcanzaba ese incremento interanual do IPC desde febreiro de 2017.
Na comparativa con xuño de 2020, dispárase o prezo da vivenda (+13,1%), seguida do transporte (+9,8%). En cambio, caen comunicacións (-4,5%), lecer e cultura (-0,9%) e bebidas alcohólicas e tabaco (-0,7%).
Na variación mensual, hai un incremento xeneralizado de prezos con vivenda (+2,5%) e transporte (+1,1%) á cabeza. Só caen vestido e calzado (-0,8%). Pola súa banda, de media no que vai de ano, entre xaneiro e xuño, os prezos galegos eleváronse un 2,7%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.