"O aforro está a volver a mirar ao ladrillo", di un experto inmobiliario
O prezo da vivenda de segunda man en Galicia sobe máis que a media de España. Rexistrou un aumento dun 2,78% en xullo fronte ao ano pasado, segundo un informe.
Por Europa Press / Redacción | SANTIAGO DE COMPOSTELA | 02/08/2021 | Actualizada ás 10:15
A vivenda de segunda man en Galicia en xullo de 2021 tivo un prezo medio de 1.273 euros por metro cadrado, o que implica unha subida dunha 2,78% fronte ao ano pasado, segundo un informe mensual de prezos de venda de pisos.com.
Segundo ese informe, esa cifra supuxo un descenso do 0,17 por cento fronte ao mes de xuño e, interanualmente, produciuse unha subida do 2,78%. Ademais, destaca que Galicia foi a sexta autonomía máis alcanzable de España, por detrás de Estremadura (800 euros por metro cadrado), entre outras.
En canto á vivenda de segunda man en España, en xullo de 2021 rexistrou un prezo medio de 1.848 euros por metro cadrado, o que supuxo un ascenso mensual do 0,15%. Dun ano a outro, a cifra rexistrada "marcou unha subida do 1,96%", segundo reflicte o informe.
O director de Estudos de pisos.com, Ferran Font, manifestou que "os prezos seguen sen dar grandes sorpresas, con subidas e axustes pouco pronunciados, o cal é unha boa noticia para a economía española, que ten no sector inmobiliario un aliado fiel".
Así mesmo, o portavoz do portal inmobiliario indicou que "o aforro, que alcanzou máximos históricos a finais do ano pasado, está a volver a mirar ao ladrillo". "Porque, sen dúbida, falamos dun investimento seguro, con garantías e con grandes posibilidades de revalorización", abundou.
Así mesmo, Font sinala que "tras un 2020 fortemente condicionado pola crise pandémica e un primeiro semestre de 2021 de progresiva volta á normalidade, é de esperar que parte da demanda que estivo esperando un panorama económico máis estable, por fin se decida e aproveite estes meses máis tranquilos para filtrar oferta e visitar inmobles en venda".
Todo apunta a que de aquí a finais de ano "as operacións de compravenda e a concesión de hipotecas van pisar o acelerador". Con todo, Font admite que "non hai que perder de vista o impacto que podería ter unha Lei de Vivenda que acumula moito atraso".
PROVINCIAS E CAPITAIS
A Coruña foi a duodécima capital máis cara do país e, mensualmente, a provincia de Pontevedra (1,35%) rexistrou "o oitavo incremento máis marcado do país", indica pisos.com. Pola súa banda, a coruñesa (-1,15%) foi a sétima provincia española que "máis se devaluou", engadiu.
Dun ano a outro, todas subiron, con Lugo (6,69%) sétima provincia española que máis se revalorizou. E, con 1.492 euros por metro cadrado en xullo de 2021, Pontevedra foi a provincia máis cara de Galicia.
No lado oposto colocouse Lugo (880 euros por metro cadrado) como a novena provincia española máis alcanzable. En canto ás capitais de Galicia, todas caeron mensualmente, coa Coruña (-2,26%) co cuarto axuste "máis relevante do país", abunda. Ademais, o informe indica que todas as capitais galegas creceron dun ano a outro. Deste xeito, Lugo (6,58%) foi a duodécima no ranking de maiores subidas nacionais.
En cuestión de prezos, A Coruña (2.137 euros por metro cadrado) foi a duodécima capital máis custosa a nivel nacional e Lugo (1.385 euros por metro cadrado) ocupou o décimo quinto lugar na listaxe nacional das máis alcanzables.
