Por Europa Press / Redacción | SANTIAGO DE COMPOSTELA | 11/08/2021 | Actualizada ás 12:35
A organización Xuventudes Socialistas de Galicia (XSG) criticou a "estigmatización" que se fai dos mozos na última campaña de vacinación compartida en redes pola Consellería de Xuventude.
Así, cargaron contra o presidente da Xunta, Alberto Núñez Feijóo, xa que consideran "vergoñento" que se comparta esta campaña "chea de estereotipos" tras un verán no que o presidente autonómico "puxo a diana dos males sanitarios" na mocidade, segundo afirman nun comunicado.
Nesta campaña, pódese ver como un usuario recibe dúas mensaxes. Por unha banda, o SMS coa cita para vacinarse e, doutra banda, unha notificación de Instagram na que se pode ver que o covid deixou de seguilo na devandita rede social. Desta maneira, a organización asegurou que esta promoción mostra unha visión "distorsionada e infantil" dunha mocidade da que "parece rirse" o Goberno galego.
"CAMPO DE MINAS"
A este respecto, Xurxo Doval, de XSG, manifestou que "a área da mocidade parece un campo de minas" no que o obxectivo é "salvar ao soldado Feijóo a base de rebentar bombas" contra os mozos.
Nesta liña, o mozo socialista reprochou ao presidente da Xunta a súa "nefasta xestión" e pediulle que "asuma a súa responsabilidade" e explique as "decisións contraditorias" tomadas para a mocidade con respecto ás medidas covid.
Así mesmo, Xurxo Doval afirmou que os mozos galegos foron "responsables" durante a pandemia e lembrou que asistiron aos cribados ou o colapso das solicitudes para a autocita aberta o pasado sábado para os mozos nados entre o ano 2000-2005.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.