Vázquez, nos xulgados por dicir que o BNG apoia o terrorismo
O Conselleiro de Educación e o Bloque Nacionalista Galego convocados a un acto de conciliación nos Xulgados de Santiago de Compostela.
Por Galicia Confidencial | Santiago | 16/01/2014 | Actualizada ás 12:40
Representantes do Bloque e o Conselleiro de Educación estaban citados nos xulgados este mediodía para un acto de concilación. A Xustiza buscaba que as partes chegaron a un acordo, despois da demanda dos nacionalistas contra Jesús Vázquez.
O político do PPdeG declarou a El País, en referencia ao BNG, que "se están descubriendo día tras día y a las pruebas me remito cuando apoyan a grupos terroristas". Cuestionado polas críticas á pregunta para elixir lingua nas aulas Vázquez tamén dixo que "quienes se oponen a ella están fuera del sistema democrático y de las leyes que ellos mismos votaron". Cómpre lembrar que a Xustiza anulou o carácter vinculante da polémica pregunta aos pais, unha das pezas claves do chamado "Decreto do Plurilingüismo".
Polo de agora non se coñece o resultado do acto de conciliación, pero parece complicado que haxa acordo entre as partes. Segundo informa La Voz, o conselleiro non acudirá aos xulgados e mandará a un representante.
Polo tanto, o máis probábel é que un xuíz teña que determinar se a liberade de expresión ampara acusar ao Bloque de "apoiar a grupos terroristas". O BNG condenou o uso da violencia para lograr fins políticos en inumerábeis ocasións. O Bloque tamén critica a lexislación antiterrorista que permite, entre outros aspectos, que os acusados de terrorismo boten até tres anos na cadea sen xulgar.
