As "bestas" de Sabucedo volven este luns ao seu hábitat natural tras a rapa de 62 cabalos
Neste último curro, segundo a organización "máis dinámicos dos últimos anos", producíronse 10 incidencias.
Por Europa Press / Redacción | PONTEVEDRA | 29/08/2021 | Actualizada ás 19:21
Os cabalos de Sabucedo volverán este luns ao seu hábitat natural nos montes da parroquia tras a rapa deste domingo na que os 'aloitadores' conseguiron cortar as crines e desparasitar a 62 cabalos.
Tal e como sinalou a organización nun comunicado, este foi un dos curros "máis dinámicos dos últimos anos". A rapa deste domingo, de case dúas horas, saldouse con 10 incidentes: sete 'aloitadores' contusionados, un con dous puntos no beizo debido ao cabezazo dun cabalo e outro cunha fractura nun pé por unha pisada dun dos animais. Ademais, a estas indicidencias súmase a do camareiro do posto de polbo, que foi trasladado ao Hospital Clínico de Santiago tras sufrir unha indisposición.
A organización destacou que os 72 'aloitadores' realizaran previamente o preceptivos test de antíxenos, cun 100% de resultados negativos.
Dado que a Asociación Rapa das Bestas decidiu suspender o curro solidario do luns nesta primeira edición post-covid, a festa finalizará na tarde deste luns coa devolución dos cabalos ao monte.
