Carmela Silva denuncia que a Xunta quere aumentar un "180%" o recibo da auga dos fogares galegos
Reclama a retirada do anteproxecto de lei do ciclo integral, que tacha de "escándalo" e de "ataque" á autonomía local.
Por Europa Press / Redacción | SANTIAGO DE COMPOSTELA | 10/09/2021 | Actualizada ás 13:45
A presidenta da Deputación de Pontevedra, Carmela Silva, considera un "escándalo" o anteproxecto de lei do ciclo integral da auga da Xunta de Galicia, xa que inclúe dous novos canons que suporá "aumentar o 180%" do recibo da auga dos fogares e "o 130%" nas empresas.
En rolda de prensa, Carmela Silva confirmou que este venres a Deputación de Pontevedra vai remitir as súas alegacións ao anteproxecto, que considera "inxusto e unilateral". Denuncia que o texto "atenta contra a autonomía local e contra a cidadanía", polo que pide a retirada deste anteproxecto por ser "un ataque ao mundo local". "Obríganos a asumir máis competencias impropias cos mesmos recursos e a financiar obras fóra das nosas competencias", quéixase.
Nesta liña, Carmela Silva afirmou que "a Xunta recorta os recursos ao ciclo da auga e fai que as entidades locais e a cidadanía asúmano". "É un verdadeiro escándalo este anteproxecto", sentenciou, á vez que avisa de que "o anteproxecto non contempla tarifas sociais para as persoas vulnerables".
NOVAS CARGAS PARA OS MUNICIPIOS
No caso dos concellos, indicou que terán que asumir novas cargas administrativas, custos e sancións, se adhiran ou non voluntariamente á firma dos convenios con "un novo canon cunha tarifa que duplica a actual". Carmela Silva lamentou que, "en lugar de axudar aos concellos a loitar contra as fugas de auga, a Xunta penalízaas".
No caso das deputacións, "dinamita a súa suficiencia financeira" e suporía ter que recortar noutras prestacións. "A Xunta quere tutelar a nosa capacidade de decisión ao impornos a xestión dos recursos". "As deputacións non imos poder participar na planificación, só imos pagar (...) se isto ocorre, teremos que recortar noutros servizos", dixo a presidenta da Deputación.
A mandataria provincial lembrou que a Deputación de Pontevedra, a través do Plan Concellos, xa financia máis de 284 obras con 23 millóns de euros, pero "o anteproxecto obriga a un modelo de financiamento sen límites". E é que "a 11 municipios da provincia, se non se adhiren, a Xunta deixará de darlles o servizo".
