Deputación de Pontevedra e Asime impulsan unha iniciativa para acabar coa fenda tecnolóxica de xénero
"TecnoLóxicas" ten como obxectivo a mentorización directa de cen mulleres.
Por Europa Press / Redacción | VIGO | 10/09/2021 | Actualizada ás 19:50
A Deputación de Pontevedra e a Asociación de Industrias do Metal e Tecnoloxías Asociadas (Asime) presentaron este venres o proxecto 'TecnoLóxicas', unha iniciativa que pretende acabar coa fenda tecnolóxica de xénero e xerar unha "cultura do talento feminino" neste ámbito.
A iniciativa, que optará a recibir axudas do fondo Next Generation da UE, pretende dar visibilidade e fomentar a presenza das mulleres no mundo das tecnoloxías e as titulacións STEM, ademais de impulsar a súa contribución ao enriquecimieto do tecido industrial.
'TecnoLóxicas' foi presentada pola presidenta da institución provincial, Carmela Silva, e polo secretario xeral de Asime, Enrique Mallón, nun acto celebrado en Vigo, no que tamén participou a CEO de Itera Técnica, Lorena Rosende.
O programa (que contará cunha caseta na feira Mindtech, a próxima semana) púxose como meta a mentorización directa de 100 mulleres, que serán emprendedoras tecnolóxicas ou profesionais altamente cualificadas, para inserirse laboralmente de forma directa en empresas do sector.
Silva xustificou a necesidade dun proxecto así, porque "as mulleres non poden perder o tren, perder a posibilidade de participar na economía e nos empregos de calidade". Respecto diso, lembrou que as mozas apenas se matriculan en titulacións STEM, como as enxeñarías; todo iso a pesar de que nos primeiros ciclos educativos as nenas sacan mellores notas en materias como as Matemáticas.
PROXECTO CON "SENSIBILIDADE"
A presidenta da Deputación puxo en valor o compromiso das empresas na igualdade e tamén das asociacións empresariais, "a pata" que faltaba. Nese sentido, agradeceu a "sensibilidade" de Asime á hora de impulsar 'TecnoLóxicas', cuxa data de posta en marcha prevista é 2022.
Pola súa banda, Enrique Mallón, destacou que a proposta "ten unha sensibilidade especial" e é "un proxecto histórico" que marcará "tendencia" no traballo a favor do emprego tecnolóxico feminino, e da capacitación das mulleres no ámbito industrial e empresarial.
Mentres, Lorena Rosende, advertiu de que os datos de empregabilidade das mulleres no sector tecnolóxico arroxan "cifras dramáticas", que cada ano "van a peor", algo preocupante de face ao futuro, xa que os empregos de calidade serán tecnolóxicos "e estase excluíndo ás mulleres".
'TecnoLóxicas' baséase en tres alicerces: a formación, a orientación e a aceleración. Así, darase formación (incluídas prácticas) a estudantes e tituladas en ramas técnicas atendendo ás demandas do mercado; tutelarase ás participantes por parte de profesionais femininas do sector e levarán a cabo acciones de sensibilización; e, finalmente, seleccionaranse para unha aceleradora 10 proxectos, que recibirán financiamento para axudar á súa viabilidade.
