Por E.P. | SANTIAGO DE COMPOSTELA | 29/09/2021 | Actualizada ás 12:34
A Real Academia Galega de Ciencias (RAGC) distingue a traxectoria consolidada de cinco científicas e científicos galegos en activo da Universidade de Santiago de Compostela (USC), Universidade da Coruña (UDC) e da Universidade de Vigo (UVigo) coas Medallas e Investigación 2021.
Os catedráticos Carmen Álvarez, Carlos Hervés, Luís Castedo, Manuel Ladra e María Antonia Señarís recibirán a súa distinción no acto do Día da Ciencia en Galicia, que se celebrará o día 8 de outubro. Esta distinción, conforme sinalou a Academia nun comunicado, recoñece na súa terceira edición traxectorias singulares de investigación, desenvolvidas en Galicia, ademais de fomentar a promoción da ciencia e a tecnoloxía galegas para tratar de difundir á sociedade o aprecio polos valores científicos.
En concreto, Carmen Álvarez Lorenzo (Santiago de Compostela, 1970) recibe a medalla Ánxeles Alvariño González, da sección de Bioloxía e Ciencias da Saúde. Catedrática de Farmacia e Tecnoloxía Farmacéutica na USC, é académica numeraria da Real Academia de Farmacia de Galicia e Fellow do American Institute for Medical and Biological Engineering (AIM_BE).
"Esta distinción supón un estímulo e tamén un reto para o meu traballo futuro, e quero compartila con todas as persoas que me apoiaron desde os inicios da miña carreira e enriquecéronme a través dos seus ensinos, cos meus estudantes de doutoramento e con todos os demais membros do grupo I+DFarma", sinala.
A medalla Domingo García Sabell Rivas, da sección de Ciencias Económicas e Sociais da RAGC, destaca a traxectoria de Carlos Hervés Beloso (Marín, 1953), catedrático desde 1989 que exerce como docente e investigador desde 1975, ano no que se licenciou en Ciencias Matemáticas na USC.
"A concesión da medalla supón unha gran satisfacción persoal, polo recoñecemento á miña traxectoria científica durante máis de 40 anos, ao ser o máis prestixioso a nivel galego no ámbito onde traballo. Pero tamén é un respaldo á investigación pura en matemáticas na USC", apunta o científico, que considera tamén que se trata dun "recoñecemento" ao seu departamento e á Facultade de Matemáticas, pola súa posición no liderado internacional en Matemáticas nos últimos anos".
O enxeñeiro de telecomunicacións Luís Castedo Ribas (Santiago de Compostela, 1966) foi elixido pola sección de Ciencias Técnicas para recibir a medalla Isidro Parga Pondal. É catedrático da UDC, á que se incorporou en 1994 tras obter un ano antes o título de doutor enxeñeiro de telecomunicación pola Universidade Politécnica de Madrid.
"Sinto moi honrado porque unha institución de prestixio como a RACG premia a miña traxectoria académica e investigadora nun ámbito tan apaixonante e actual como as tecnoloxías da información e comunicacións. Quero compartir este recoñecemento co meu grupo de investigación e coa UDC", destaca.
A medalla Enrique Vidal Abascal, da sección de Matemáticas, Fisica e Ciencias da Computación, correspóndelle a Manuel Eulogio Ladra González (A Coruña, 1956). É catedrático de Álxebra na USC. "A concesión da medalla supón unha gran satisfacción persoal, polo recoñecemento á miña traxectoria científica durante máis de 40 anos, ao ser o máis prestixioso no ámbito galego no que traballo", dixo para destacar tamén que supón un respaldo á investigación pura en matemáticas.
Ademais, María Antonia Señarís Rodríguez (Santiago de Compostela, 1965) recibe a medalla Antonio Casares Rodríguez, da sección Química e Xeoloxía. É catedrática de Química Inorgánica da UDC, onde desenvolveu a maior parte da súa carreira. A científica asegurou que lle "honra" este recoñecemento tanto a nivel persoal como profesional e trasladou o seu agradecemento a todas as persoas e institucións que a apoiaron ao longo da súa carreira.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.