Denuncian irregularidades nas oposicións á Xunta: un exame perdido, opositores mal identificados e preguntas inconexas

Un grupo de opositores demandan repetir o segundo exame de oposición a auxiliar administrativo da Xunta e non descartan acabar nos xulgados.

Por Galicia Confidencial | Compostela | 03/10/2021 | Actualizada ás 20:24

Comparte esta noticia

O exame de informática do martes pola tarde en Silleda, segundo das oposicións de acceso a máis de 300 prazas de auxiliar administrativo da Xunta e ao que acudían case 3000 aspirantes convocados, decorreu segundo un grupo de opositores con ausente normalidade. Opositores que "non daban crédito ante a sucesión de catástrofes que se foron sucedendo ao longo da tarde" denuncian agora a polémica convocatoria e esixen (xunto a tamén preparadores) a repetición do exame e a "depuración de responsabilidades por todos os sucesos ocorridos".

Oposicións en Silleda para técnico en coidados auxiliares de enfermaría. XUNTA - Arquivo
Oposicións en Silleda para técnico en coidados auxiliares de enfermaría. XUNTA - Arquivo

Entre as cuestións que denuncian estes aspirantes a auxiliar administrativo está o feito de ter agardado unha hora e media máis do previsto a comezar a proba porque ese foi o tempo "necesario para que os membros de seguridade cacheasen un por un a cada aspirante ás portas dos pavillóns". Aínda así, apuntan, durante o exame irrompeu dúas veces a policía porque descubriron a dous opositores copiando.

Outra das anomalías acontecidas, denuncian, foi que unha vez rematado o tempo de exame: "hai un exame que desaparece misteriosamente, e durante 25 minutos os membros da organización non deixan de correr dun lado ao outro en busca do exame perdido, ata que un opositor decide entregar o exame". Na mesma liña, aseguran que a desorganización foi patente "con alumnos non identificados correctamente mediante DNI ou o presidente do tribunal interrompendo cada dous por tres por megafonía para anunciar erros no exame escrito en versión galega". A este respecto din que, malia que avisaban de que o tempo paraba, só paraban para correxir o exame aqueles aspirantes que o facían en galego, mentres que os outros seguían a respostar preguntas.

Moitos opositores e academias uníronse para alegar ao redor do 50% das preguntas, posto que non as consideran adecuadas ben "por non ser claras, por non ser correctas as opcións de resposta dadas por válidas polo tribunal ou por non corresponder coa versión do programa que se esixía na convocatoria". Afirman que, aínda que este tipo de actuacións por parte dos tribunais de oposicións da Xunta de Galicia é habitual, nesta ocasión "é aínda máis seria".

.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 Opositora molesta

Unha vergonza. Aínda por riba, un exame para auxiliar administrativo que tes que ser inxeñeiro aeroespacial da NASA e formarte en Calc para poder facer ben a metade das preguntas. Nótaselles moito que non queren cobrir as plazas. 2 anos para faceren un exame de 40 preguntas e facelo con preguntas ambiguas, non axustadas á versión do programa, nin balanceado co que se pedía. O dito, unha vergonza.

1 Atlante

Lembrade atado e ben atado... Os infieis neofranquistas parasitando o sistema polos séculos dos séculos amén...