O carballo do bosque do Banquete de Conxo, candidato a Árbore Europea 2022
A especie conta con máis de 250 anos de historia e competirá xunto a outras dez candidaturas.
Por Europa Press / Redacción | SANTIAGO DE COMPOSTELA | 21/10/2021 | Actualizada ás 16:58
O carballo situado no bosque do Banquete de Conxo na capital galega, unha especie que conta con máis de 250 anos de historia, competirá xunto a outras dez candidaturas polo recoñecemento de Árbore Europea do ano 2022.
A iniciativa foi presentada este xoves da man do alcalde de Santiago, Xosé Sánchez Bugallo, a edil de Medio Ambiente, Mila Castro, e representantes dos diferentes grupos municipais, como Alejandro Sánchez-Brunete (PP), Goretti Sanmartín (BNG) ou Branca Novoneyra (Compostela Aberta).
O bosque de Conxo chegou a albergar a máis dun milleiro de árbores deste tipo, dos que na actualidade sobreviven menos de medio centenar debido especialmente aos danos provocados polos incendios forestais que derivaron nun proceso de substitución por outras especies foráneas, sobre todo eucaliptos.
Esta árbore, coñecida como 'O Avó', atópase no tramo final do Camiño Portugués e representa un exemplar singular que resistiu durante máis de 250 anos e foi testemuña de momentos emblemáticos e transcendentais da vida cultural e histórica de Santiago de Compostela e de Galicia.
O espazo forma parte da obra e textos que Rosalía de Castro dedicou a esta contorna, que acolleu o 2 de marzo de 1856 a celebración do chamado Banquete de Conxo, unha comida onde estudantes universitarios de alta clase social serviron a obreiros e artesáns como símbolo de fraternidade e nun momento de importantes desigualdades sociais entre clases na capital galega.
"UN EXEMPLO DE RESISTENCIA"
O alcalde compostelán destacou que esta leira representa "un espazo marabilloso" que formou parte no seu día do antigo convento da Mercé e que foi cambiando de mans da Igrexa, a Deputación provincial e a Xunta ata a súa cesión ao Concello local de parte do terreo para a súa recuperación e rehabilitación como parque público no ano 2018.
"Un exemplo de resistencia, de capacidade de supervivencia, e que está nunhas estupendas condicións", destacou Bugallo, quen fixo un chamamento á veciñanza da cidade para recoñecer este espazo e tomalo como propio. As votacións para o certame realizaranse na web 'arboleuropeo.es' e o prazo estenderase desde este xoves e ata o 20 de novembro. A decisión será tomada por voto popular, no apartado 'Votar por unha árbore' no que se incluirán todas as candidaturas.
