Gandeiros retiran leite de Capsa e Lactalis dos supermercados
Piden non consumir estas marcas que "teñen responsabilidade directa" sobre a situación de gandeiros.
Por Europa Press / Redacción | SANTIAGO DE COMPOSTELA | 19/11/2021 | Actualizada ás 13:50
Gandeiros, convocados por Unións Agrarias, retiraron leite de Capsa (como Larsa e Central Lechera Asturiana) e Lactalis do supermercado Carrefour, no compostelán centro comercial das Cancelas, como boicot a marcas destas compañías para que repercutan nos produtores os incrementos de prezos pagan nos lineais os consumidores.
Na mañá deste venres, Unións Agrarias proseguiu coa súa campaña de presión a dúas das principais industrias que recollen leite en Galicia, contra as cales protagonizou protestas nos últimos días.n Así, entraron ao centro comercial, onde comezaron a apilar cartóns de leite destas marcas para a súa retirada dos lineais do supermercado.
En declaracións, o secretario de Coordinación Sectorial de UU.AA., Felix Porto, explicou que se busca "sensibilizar" ao consumidor e que "saiba cales son os responsables directos do que está a suceder", con "baixos prezos que hai nestes momentos que non cobren os custos de produción".
BOICOT
O pasado xoves, a organización agraria chegou a un acordo con "practicamente" toda a distribución para a retirada de marcas de Capsa e Lactalis dos supermercados esta fin de semana. Con todo, lamenta a "marcha atrás dalgunha distribución", onde Carrefour "foi das máis reticentes". Agora seguirán coa supervisión en Alcampo e outros establecementos. Así, Félix Porto pediu que "non se consuman" marcas de Capsa e Lactalis, que "teñen responsabilidade directa" sobre a situación de gandeiros.
E é que censura que "non moveron un só céntimo" do prezo base de 29,5 céntimos por litro que abonan a produtores galegos, a pesar de que a distribución "xa repercutiu" na industria unha subida de cinco céntimos por litro. "Están a quedarse con diñeiro dos produtores", censura. Por iso, Unións Agrarias avisa de que a semana que vén seguirán cos actos reivindicativos nos supermercados.
Igualmente, o Sindicato Labrego Galego (SLG) chamou ao boicot de produtos de Lactalis Puleva polos prezos que pagan. Este venres realizaron un acto informativo a consumidores nun Gadis de Lugo.
