Protestas contra o "asalto" da Xunta á protección dos montes en man común

A organización galega de comunidades de montes denunciou o "asalto" á propiedade veciñal cunha protesta este mércores ás portas do Parlamento galego, onde anunciou unha iniciativa lexislativa popular en defensa desta figura tradicional. Fronte ao Pazo do Hórreo, varias decenas de persoas corearon consignas como 'o monte veciñal non se toca', 'Feijóo, atende, o monte veciñal non se vende' e 'non, non, non á expropiación'. Alí saíron a saudarlos a portavoz nacional do BNG, Ana Pontón, e o deputado nacionalista Xosé Luís Rivas ,'Mini'.

En declaracións aos xornalistas, o presidente da organización, Xosé Alfredo Pereira, criticou as dúas modificacións na lei de montes que introduce a Xunta a través da lei de acompañamento aos orzamentos, posto que "furta o debate" co sector. Reclamando a súa retirada, asegurou que "atentan contra o carácter germánico da propiedade comunal", pola posibilidade de declarar o monte en estado de "grave abandono" e que "pase" a mans de "unha empresa forestal ou madeireira".

Pereira censurou así a posibilidade de "confiscación" dos montes en man común e a "usurpación da xestión", ante o que avanzou que a organización recollerá firmas para presentar unha iniciativa lexislativa popular que protexa a esta figura fronte a estes "ataques".

EUCALIPTOS "ATA NAS MACETAS"

Pola súa banda, o parlamentario do Bloque Xosé Luís Rivas, 'Mini', lamentou que "se está perpetrando un asalto aos montes veciñais" e asegurou que o PP "xa se quitou a máscara", posto que o que quere é plantar eucaliptos "ata nas macetas". Isto, engadiu, supón un lastre para os montes veciñais non xa só como figura tradicional, senón en canto ao que supoñen de "uso tranquilo e sustentable".

Comunidades de montes protestan diante do Parlamento galego | Fonte: Europa Press