Xunta e Fundación Juana de Vega colaborarán para impulsar fusións entre concellos

Rueda lembra que o mapa administrativo local galego data do século XIX e considera que "necesita actualizarse".

Por Europa Press / Redacción | Santiago de Compostela | 24/11/2021 | Actualizada ás 20:37

Comparte esta noticia

O vicepresidente primeiro da Xunta, Alfonso Rueda, asinou este mércores un acordo coa Fundación Juana de Vega para a realización dun estudo no que se analicen as fusións municipais levadas a cabo en Galicia, ademais de impulsar novos procesos.

A Xunta e a Fundación Juana de Veiga colaborarán na análise e impulso das fusións municipais
A Xunta e a Fundación Juana de Veiga colaborarán na análise e impulso das fusións municipais | Fonte: Xunta de Galicia.

O acordo, do que informou a Vicepresidencia primeira, materializouse no centro sociocultural de Cerdedo-Cotobade, unha infraestrutura que se beneficiou das achegas que o Goberno galego destina aos procesos de fusións municipais.

Alfonso Rueda, que asistiu acompañado pola directora xeral de Administración Local, Natalia Prieto, lembrou que o mapa político-administrativo local de Galicia data do século XIX e necesita actualizarse "para ofrecer uns servizos públicos máis eficientes".

A Xunta destaca que Galicia foi pioneira no impulso das fusións municipais ao entender que, coa dispersión da poboación, os concellos pequenos cada vez teñen máis dificultades para xestionar e financiar os servizos que os seus veciños necesitan, por iso é polo que a Administración galega premie nas súas convocatorias de axudas públicas aquelas que cheguen de mancomunidades ou entidades asociadas.

Nos últimos anos en Galicia fusionáronse catro concellos: Oza e Cesuras no 2013 e Cerdedo e Cotobade no 2017. Pasados catro anos do proceso máis recente, a Xunta considera chegado o momento de analizar os resultados e as vantaxes para os cidadáns dos municipios fusionados.

O traballo da Fundación Juana de Vega, que conta cun equipo especializado na caracterización socioeconómica e demográfica dos concellos de Galicia, pretende tamén seguir promovendo a unión de concellos.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta