A FP galega recibirá máis dun millón de euros do Goberno central para a creación de 630 prazas
O delegado do Goberno en Galicia, José Miñones, destacou que, con esa dotación, refórzanse os investimentos dedicados a Galicia para a modernización de Formación Profesional.
Por E.P. | SANTIAGO DE COMPOSTELA | 09/12/2021 | Actualizada ás 17:29
O delegado do Goberno en Galicia, José Miñones, anunciou que Galicia recibirá 1.181.250 euros para a creación de 630 novas prazas de Formación Profesional "co obxectivo de responder á crecente demanda por parte do alumnado".
Miñones destacou que, con esa dotación, refórzanse os investimentos dedicados a Galicia para a modernización de Formación Profesional, "que xa incluíu no mes de xuño unha partida para a mesma finalidade por importe de 6.562.500 euros".
"A modernización da Formación Profesional é unha prioridade da política educativa do Goberno", sinalou o delegado, que incidiu en que o Executivo central destinou a Galicia 21 millóns de euros do Plan de Recuperación, Transformación e Resiliencia para desenvolver este ano o Plan de Modernización da Formación Profesional.
Estes fondos, explicou, destináronse á creación de 3.484 prazas educativas e á formación de 1.572 profesores e profesoras, entre outras actuacións. Con outros 7,2 millóns de euros, apuntou, s finánciase a acreditación de competencias de máis de 27.800 traballadores galegos.
Por outra banda, para a conversión de ciclos de grao medio e grao superior en bilingües, o Executivo central financia con seis millóns de euros a creación de 45 grupos de alumnos con educación bilingüe en Galicia. Outros 772.775 euros son para a conversión de 14 aulas en espazos de tecnoloxía aplicada.
O Ministerio de Educación e Formación Profesional, explican nun comunicado, tamén asignou este 2021 outros 300.000 euros á creación de 28 aulas de emprendimiento en Galicia. No que respecta á dixitalización e sustentabilidade aplicada aos sectores produtivos, o Goberno achega 155.545 euros para a formación de 1.572 docentes.
