As pernoctacións en hoteis galegos triplícanse en novembro, o 86% de residentes en España
A tarifa media diaria situouse na comunidade galega en 58,44 euros.
Por Europa Press / Redacción | SANTIAGO DE COMPOSTELA | 23/12/2021 | Actualizada ás 10:36
As pernoctacións en hoteis galegos triplicáronse en novembro en Galicia en relación co mesmo mes do ano anterior, ata situar o total en 433.814, delas case o 86% (372.444) realizadas por residentes en España, fronte a estranxeiros (61.370). Segundo os datos que publica este xoves o Instituto Nacional de Estatística (INE), a tarifa media diaria situouse na comunidade galega en 58,44 euros, o que supón un incremento do 32,9%.
Os ingresos por habitación dispoñible en hoteis da comunidade galega, mentres, foron 20,37 euros, cunha taxa de variación anual do 223,13% neste caso.
No conxunto estatal, as pernoctacións en establecementos hoteleiros subiron un 78,7% nos once primeiros meses do ano respecto ao mesmo período de 2020, nun contexto marcado polo impacto da pandemia do coronavirus sobre o sector turístico. Só no mes de novembro as pernoctacións nos hoteis españois superaron os 14,8 millóns, o que supón multiplicar por máis de cinco (+417%) as realizadas no mesmo mes de 2020.
Atendendo á procedencia, as pernoctacións dos viaxeiros residentes en España, que representaron o 40,7% do total de novembro, superaron os 6 millóns, mentres que as dos estranxeiros excederon os 8,8 millóns.
Se se compara o dato de novembro deste ano co mesmo mes de 2019, sen pandemia, as pernoctacións en establecementos hoteleiros mostran un descenso do 19%, debido tanto ao retroceso das pernoctacións realizadas por estranxeiros (-20,9%) como ás efectuadas por españois (-16%).
A estancia media aumentou en novembro un 14,1% respecto ao mesmo mes de 2020, situándose en 2,8 pernoctaciones por viaxeiro.
