Por Europa Press / Redacción | SANTIAGO DE COMPOSTELA | 23/12/2021 | Actualizada ás 14:01
O xerente do Sergas, José Flores, limitou a "casos puntuais" o uso da contención mecánica en pacientes ingresados no Hospial Psiquiátrico de Conxo, a unha pregunta do BNG na Comisión de Sanidade, Política Social e Emprego do Parlamento galego. Nela, a deputada do BNG Iria Carreira denunciou "graves carencias" no hospital, que vinculou cun "abandono" do mesmo por parte da administración. "Hai carencias estruturais", dixo, sumando a iso as denuncias do Defensor do Pobo que alertou de "irregularidades" na atención a pacientes e que volveu a denunciar a representante nacionalista.
Sobre a Covid, manifestou tamén que "non hai un plan de contixencia específico neste hospital". "Non hai un protocolo de prevención de suicidios e hai un abuso no uso de mecanismos de contención" dos pacientes. Ademais, aludiu a un trato desigual entre homes e mulleres ingresados. Na súa resposta, o xerente do Sergas sentenciou que se está realizando un "diagnóstico" para adoptar "estratexias de futuro", pero defendeu o labor da administración. Tamén asegurou que se está traballando para seguir "as recomendacións do Defensor do Pobo".
Respecto da contención mecánica de pacientes, vinculouno con "procesos puntuais e pouco frecuentes" e sempre, insistiu, en base a uns sistemas "protocolizados". Con todo, incidiu en que o obxectivo da Xunta é ir "a unha contención cero". Nesta mesma Comisión, interveu o secretario xeral técnico da Consellería de Sanidade, Alberto Fuentes, en resposta a unha pregunta exposta pola deputada do PP Marta Rodríguez-Vispo, sobre o desenvolvemento da nova lei de ordenación farmacéutica de Galicia.
Fuentes fixo un repaso dos pasos dados e avanzou que o obxectivo é que en xaneiro ou febreiro do próximo ano poida levar ao Consello da Xunta o decreto que regula os requisitos para a preparación e entrega dos sistemas personalizados de dosificación de medicamentos nas oficinas de farmacia.
OUTROS ASUNTOS
Noutra orde de cousas, tamén nesta Comisión, a deputada socialista Marina Ortega demandou á Xunta máis recursos para abordar o "uso problemático de Internet" por parte de adolescentes. En concreto, expuxo un plan para actuar no ámbito da prevención. O director xeral de Familia, Infancia e Dinamización Demográfica, Jacobo Rey, apelou neste sentido ás iniciativas transversais de concienciación e sensibilización, ademais de aludir, como outra ferramenta, ao anteproxecto de lei de prevención de adiccións en menores que se está ultimando.
As actuacións da Axencia de Doazón de Órganos e Sangue tamén centraron a última parte da Comisión. Na súa intervención, a súa directora, Marisa López, anunciou un investimento de 360.000 euros para unha nova unidade móbil en Ourense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.