Francisco Tettamancy, o intelectual coruñés con nostalxia dos Mártires de Carral
A Deputación da Coruña homenaxea ao escritor e xornalista.
Por E.P. | SANTIAGO DE COMPOSTELA | 03/01/2022 | Actualizada ás 17:03
A Deputación da Coruña homenaxeou ao intelectual Francisco Tettamancy, un acto que marca o inicio dunha serie de actividades para pór en valor o seu legado. Trátase dunha serie de iniciativas que promoven as áreas de Patrimonio e de Normalización Lingüística, encamiñadas a pór en valor a figura e a obra do intelectual coruñés.
"Francisco Tettamancy foi un dos grandes da nosa historia e pensamos que como tal ten que ser lembrado", aseguraba este luns a deputada de Normalización Lingüística, María Muíño, na homenaxe institucional. Xunto a ela, estivo tamén o deputado de Patrimonio, Xosé Lois Penas, e a bisneta de Francisco Tettamancy Gastón, Charo Varela. "Para a familia esta homenaxe ten unha importancia non cuantificable", manifestaba, á súa vez, esta última.
A Deputación homenaxea a figura de Francisco Tettamancy tras cumprirse 175 anos da revolta galeguista de 1846, un dos fitos históricos sobre os que este intelectual coruñés ten varios traballos editados.
