Un punto cara á salvación

Ficha técnica
Celta: Yoel; Hugo Mallo, Cabral (Íñigo López, 70'), Aurtenetxe, Jony; Fontás, Krohn-Delhi, Rafinha, Augusto (Orellana, 60'), Nolito e Mario Bermejo (Santi  Mina, 60').
Real Sociedade: Claudio Bravo;  Bravo, Zaldua, Mikel, Iñigo Martínez, José Angel, Markel, Zurutuza, Sergio Canales (Rubén Pardo, 75'), Griezmann, Agirretxe (Sferovic, 83') e Carlos Vela (Chori Castro, 86').
Goles: 0-1: Sergio Canales (min. 8). 1-1: Nolito, de penalti (37'). 1-2: Griezmann (43'). 2-2: Santi Mina (min. 80)
Árbitro: Estrada Fernández (valenciano). Expulsado Aurtenetxe con vermella directa no 48'. Amarelas a Hugo Mallo (17'), Bermejo (53') e Cabral (66') no Celta e a Íñigo Martínez (28'), Canales (53'), Zaldua (63'), Griezmann (73') e Rubén Pardo (80') na Real Sociedade.
Incidencias: partido da 33ª xornada da Liga BBVA no estadio de Balaídos ante preto de 20.839 espectadores. Minuto de silencio pola memoria do doutor Juan José Crespo.

O Celta non se deu nunca por vencido. A  pesares de xogar case todo o segundo tempo con dez, buscou o empate con insistencia. A Real non pechou o partido cando puido, e Santi Mina acadou o empate a dez minutos do final. E incluso Orellana puido facer o terceiro.

Os de Luis Enrique saíron durmidos e sufriron as continuas chegadas do rival nos primeiros 20 minutos. Canales avisou do perigo que tiña cun remate coa testa e, xa no 7, marcou o 0-1 cun disparo dende fóra da área que pasou por debaixo de Yoel. Vela e Griezmann levaban perigo arreo e o Celta non se enteraba da película. Yoel evitou o segundo e Griezmann rematou fóra.

Pero pouco a pouco, o Celta foise serenando e tomando o control da man de Krohn-Delhi e Rafinha. José Ángel adiantouse a Augusto na área, Nolito rematou ben pero parou Carlos Bravo e Krohn-Dehli tentou sorprender dende lonxe nunha contra. Tamén Bermejo tivo unha, pero disparou desviado. O premio ao traballo céltico chegou no 37 cun penalti a Bermejo, que tirou de xeito maxistral Nolito fóra do alcance de Carlos Bravo. Empate xusto, pero durou pouco a ledicia. No 42, Cabral non atinou a despexar e marcou Griezmann. Menudo pau para o Celta.

Tralo paso por vestiarios, no 48', recibiu outro coa expulsión de Aurtenetxe por unha dura e inocente entrada en campo rival. Toda a segunda parte por diante cun xogador menos. O Celta tardou en repoñerse da expulsión e Griezmann errou o terceiro no 57'. Luis Enrique sacou a Santi Mina e Orellana para espertar os seus, que pouco a pouco fixéronse co control. Chegábase ás dúas áreas. Cabral evitou o remate de Carlos Vela e Santi Mina tivo dous tiros á porta.
O Celta creou perigo cunha falta lanzada por Nolito e no minuto 80 chegou o gol de Santi Mina, que rematou forte e raso un balón solto na área no 80'. De novo o empate facía xustiza aos méritos. Aínda tivo Orellana o terceiro no 83', pero parou Carlos Bravo.ç

O Celta acada un punto importante (suma 37) cara ao obxectivo da permanencia, e a vindeira semana viaxa a Almería (domingo, ás 12.00 horas), en postos de descenso.