Por E.P. | SANTIAGO DE COMPOSTELA | 13/01/2022 | Actualizada ás 19:34
O presidente da Xunta, Alberto Núñez Feijóo, avanzou o investimento de 4 millóns de euros para construír un novo edificio de Urxencias e un Punto de Atención Continuada (PAC) no Hospital Comarcal de Verín. Tamén se realizarán actuacións de eficiencia enerxética na totalidade do centro hospitalario.
Segundo explicou ao termo da reunión semanal do Executivo, o novo edificio, que terá unha superficie de case 1.500 metros cadrados, contará cunha área clínica cunha zona de control de enfermaría e sala de traballo de médicos con supervisión directa sobre as salas de observación e os 6 boxes. E na zona da PAC disporanse dúas consultas médicas e unha de enfermaría. Ademais, haberá unha consulta para casos sospeitosos de enfermidades infecciosas.
No que respecta ás melloras para incrementar a eficiencia enerxética en todo o centro, Feijóo precisou que se impermeabilizarán as cubertas do antigo edificio e instalaranse 620 paneis fotovoltaicos para fornecer enerxía a todo o conxunto do hospital. Ademais, incrementaranse as prazas de aparcadoiro, que pasarán das 167 actuais a máis de 200. Na súa intervención, reivindicou que o seu Goberno "cumpre" cos hospitais comarcais e repasou os investimentos nestes centros.
ESCOLA GALEGA DE SAÚDE PÚBLICA
O Consello da Xunta tamén iniciou este xoves a tramitación da orde pola que se regula a Escola Galega de Saúde Pública.
Segundo informou, o Executivo autonómico considéraa "prioritaria", co fin de levar a cabo "un proceso continuo de innovación e actualización do coñecemento" nesta área que dea resposta ás variacións nas demandas e necesidades da sociedade e á evolución dos sistemas sanitarios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.