Por E.P. | SANTIAGO DE COMPOSTELA | 15/01/2022 | Actualizada ás 16:23
A 'Plataforma por un transporte público digno de Ferrol e comarca' demandou á Xunta "o restablecemento inmediato dos servizos e horarios que se ofertaban coa anterior concesionaria, tanto en servizos directos por autoestrada como indirectos por estrada", neste caso coa cidade da Coruña, ademais do "restablecemento dos servizos que se prestaban a outros colectivos, como estudantes ou traballadores", tal e como manifestou Teresa Vázquez, portavoz deste colectivo.
Ditas manifestacións realizounas este sábado, 15 de xaneiro, durante unha rolda de prensa que ofreceron ante a Estación de autobuses de Ferrol, en compañía doutros integrantes desta plataforma, da que forman parte gobernos municipais, partidos políticos, sindicatos, varias asociacións veciñais, empresariado ou da cultura, ademais de veciñanza usuaria das liñas de transporte.
Dita reclamación decidiuse durante unha asemblea que este colectivo desenvolveu o pasado xoves, día 13, e na que tamén pediron "a implantación dun transporte público que considere a accesibilidade universal e inclusión como un dereito". Por iso, "é necesario modificar o contrato co obxectivo de adaptalo á actual demanda", cun "aumento de frecuencias e servizos nos horarios de maior demanda e que se dote de medios humanos e recursos materiais para a súa atención".
Ademais, solidarizáronse cos traballadores da empresa adxudicataria do transporte entre Ferrol e A Coruña, a UTE Hércules Norte. "Teñen o noso apoio nas súas demandas polos prexuízos que están a sufrir co cambio de concesionaria", dixeron.
MOBILIZACIÓNS
Teresa Vázquez xa anunciou que esta plataforma "aprobou unha serie de mobilizacións para presionar á Xunta de Galicia" e que se iniciarán o vindeiro xoves, 20 de xaneiro, cunha concentración desde as 19,00 horas, ante o edifico administrativo da Xunta na praza de España de Ferrol.
Seguiralle outra o xoves da seguinte semana, día 27, ante o Concello de Ferrol, tamén ás 19,00 horas, "coincidindo co pleno municipal, e continuaremos". Ademais, a portavoz desta plataforma adiantou que solicitarán unha reunión coa Xunta e representantes desta plataforma para "demandar que se restablezan os servizos da anterior concesionaria entre Ferrol e A Coruña e outras liñas da compañía".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.