A conselleira de Medio Ambiente bloquea a votación da moratoria eólica abandonando a xuntanza do COGAMADS
Piden que consten as irregularidades do "peche abrupto da sesión" e convocar un pleno extraordinario para tratar a paralización dos informes e concesións de parques eólicos.
Por Galicia Confidencial | COMPOSTELA | 27/01/2022 | Actualizada ás 20:41
Certo nerviosismo na Cosellería de Medio Ambiente ante a oposición social e as condenas xudiciais que están a recibir os numeros complexos eólicos proxectados no territorio galego teríase evidenciado, segundo a asociación ecoloxista ADEGA, nunha sesión do Consello Galego de Medio Ambiente e Desenvolvemento Sostíbel (COGAMADS) que tivo lugar onte. Nela participaron distintas entidades sociais que agora veñen de denunciar que a conselleira de Medio Ambiente, Ángeles Vázquez, tería abandonado precipitadamente a xuntanza do COGAMADS bloqueando a votación da moratoria eólica.
Porque na xuntanza, a petición de distintas entidades sociais entre as que figuran o Sindicato Labrego Galego- Comisións Labregas (SLG-CCLL), Asociación para a Defensa Ecolóxica de Galiza (ADEGA), a Federación Ecoloxista Galega (FEG) e a Sociedade Galega de Historia Natural (SGHN), na orde do día foi incluído o tratamento dun punto sobre eólicos.
Segundo sinalan dende ADEGA, logo de realizar a súa intervención o vogal do SLG-CCLL, Diego Sánchez Agra, solicitou, co apoio de ADEGA, FEG e SGHN, a votación do Consello para emitir un “Acordo” sobre a necesidade de paralización dos informes e concesións de parques eólicos até que o Plan Sectorial Eólico de Galicia, que data do ano 1997 e "non foi sometido á avaliación ambiental estratéxica que obriga a Lei", sexa revisado e sometido a avaliación. Esta posición instaría tamén ao establecemento de criterios de avaliación para evitar o fraccionamento dos proxectos e a promover un cambio na lexislación para a mellor protección da cidadanía, o medio ambiente e o patrimonio.
No tocante á protección do territorio e ós valores medioambientais, subliñan dende ADEGA que este acordo debería facer mención explicita á necesidade de "derrogar as Leis de Depredación (5/2017 e 9/2021)". E en segundo termo, solicitaron levar tamén a votación a elaboración por parte do COGAMADS dun informe sobre o encaixe do actual modelo enerxético na "sustentabilidade e resiliencia do territorio galego".
Pero a Conselleira de Medio Ambiente e presidenta do COGAMADS, censura a asociación ecoloxista, eludíu tramitar a solicitude "abandonando precipitadamente a xuntanza ante a sorpresa e indignación das asistentes", quedando mesmo sen tratar o último punto da orde do día da reunión.
Por iso, as entidades SLG-CCLL, ADEGA, FEG e SGHN piden "a constancia en acta das dúas solicitudes de votación realizadas, as irregularidades no peche abrupto da sesión, e a convocatoria á maior brevidade posíbel dun pleno extraordinario do COGAMADS para tratar as propostas bloquedas" pola conselleira Ángeles Vázquez.
