Galicia perde máis de 350 granxas lácteas en 2021
As granxas en activo atópanse no camiño de baixar das 6.000.
Por Europa Press / Redacción | SANTIAGO DE COMPOSTELA | 29/01/2022 | Actualizada ás 17:46
Galicia pechou 2021 con 6.404 granxas activas que realizan entregas de leite, o que supón 364 explotacións menos que un ano antes, segundo datos do Ministerio de Agricultura.
Despois de que en 2020 a comunidade galega descendese por primeira vez das 7.000 explotacións de vacún lácteo, continúa coa súa perda de granxas no último ano, xa camiño de chegar a baixar do listón das 6.000 proximamente.
Con todo, Galicia segue á cabeza en número de granxas do país, que supoñen máis da metade das 11.424 existentes en toda España. A seguinte comunidade, a bastante distancia, é Asturias (1.438). Deste xeito, a produción das granxas galegas rozou as 3.000.000 toneladas en 2021, o 40% do total das 7.477.221 toneladas producidas en España. O 67% das entregas que realizaron os gandeiros galegos foron na propia comunidade, mentres que o 33% restante enviouse a outras autonomías.
Todo iso nun ano marcado polas mobilizacións do sector polos baixos prezos que reciben os produtores galegos. Continúan á cola do país, con 35,6 céntimos por litro, por baixo da media española de 36,4 céntimos.
