Por E.P. | SANTIAGO DE COMPOSTELA | 09/02/2022 | Actualizada ás 17:54
A Deputación de Pontevedra axudará os concellos a adaptar as súas ordenanzas municipais e as taxas pola xeración de residuos, segundo avanzou este mércores o vicepresidente da institución provincial, César Mosquera.
Mosquera mantivo unha reunión con representantes municipais de 50 concellos da provincia para abordar o novo marco normativo dos residuos e as súas implicacións para os gobernos locais, e advertiu de que, ante o novo escenario, as entidades locais deberán corrixir as súas ordenanzas de residuos e implantar taxas que graven o pago por xeración.
Neste encontro, os representantes municipais trasladaron a súa preocupación polo cambio que xa está en marcha e que obriga ás administracións locais, baixo ameaza de sanción, a cumprir os obxectivos de reciclaxe, tendo como primeira data 2025 para reciclar o 55% dos residuos.
César Mosquera subliñou que ningunha das novas normativas, nin a transposición da directiva europea, nin a nova lei estatal nin a autonómica, prevén achegas económicas, senón que todas están baseadas no principio de 'quen contamina paga', cargando o financiamento do sistema nas taxas sobre os produtores dos residuos. De aí a necesidade de corrixir as ordenanzas municipais establecendo diferentes escalas neses pagos.
A nova lei insiste expresamente en que hai que aproximarse ao pago por xeración: quen máis residuos xera debe pagar máis, e Mosquera anunciou que a Deputación vai pór axudas a disposición dos gobernos locais "que queiran cumprir cos obxectivos, coa normativa, a legalidade, o planeta, o medio ambiente, e con todos os obxectivos que son irrenunciables".
INSPECCIÓNS
O Plan Revitaliza, segundo sinalou o vicepresidente da Deputación, vai conceder axudas económicas para realizar os investimentos necesarios, pero advertiu de que se van realizar inspeccións para que realmente o diñeiro se destine a obter resultados e cumprir os obxectivos de reciclaxe.
Tamén axudará na redacción de novas ordenanzas municipais conforme á normativa, así como na xestión da obtención e transmisión de información sobre os residuos locais á Xunta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.