Xubilados protestan nas cidades galegas para reclamar pensións dignas

Xubilados galegos, convocados pola CIG, manifestáronse este xoves nas cidades para reclamar pensións "dignas", nunhas concentracións nas que denunciaron que as políticas actuais "empobrecen e precarizan as súas vidas".

Así, os pensionistas denuncian que, a partir deste ano, perderán poder adquisitivo, xa que as pensións subirán pola aplicación do IPC medio, no canto de facelo pola diferenza interanual, mentres a revisión de desviacións só se vai facer cada cinco anos.

Ademais, a CIG critica a falta de servizos bancarios que sofren os maiores "como consecuencia da agresiva dixitalización no que está inmersa a banca, no seu descontrolado e insolidario afán por xerar beneficios á conta do que sexa".

Igualmente, o colectivo de pensionistas do sindicato demanda a posta en marcha dun Sistema Público Galego de Servizos de Atención ás Persoas, o cal aglutine as actuais residencias, centros de día e servizos de axuda no fogar. Aquí, tamén se empraza á Xunta a que destine máis recursos á creación de máis prazas e maior calidade na atención.