"Boicot á enerxía nuclear" para lembrar as vítimas de Fukushima 11 anos despois
Ecoloxistas en Acción pide emprender diversas accións persoais, que van dende reducir o consumo un día ata cambiar a unha comercializadora 100 % renovable ou producir a túa propia enerxía.
Por Galicia Confidencial | SANTIAGO DE COMPOSTELA | 11/03/2022 | Actualizada ás 08:35
Este venres, 11 de marzo, cúmprense 11 anos do accidente nuclear de Fukushima, en Xapón. Nese lugar, hoxe en día, a radiación continúa producindo mutacións e matando organismos vivos, as verteduras seguen o seu curso e a acumulación de resíduos radioactivos letais desborda "todas as previsións iniciais". Unha ampla zona non pode sequera habitarse.
Como protesta para lembrar as vítimas deste desastre, o movemento ecoloxista pide "boicotear a enerxía nuclear" con diversas accións persoais: dende reducir o consumo un día ata cambiar a unha comercializadora 100 % renovable ou producir a túa propia enerxía. É o que vén de propoñer Ecoloxistas en Acción, que pide "deixar de financiar as grandes eléctricas e declarar a nosa independencia de tecnoloxías de xeración sucia, centralizada, e insostible".
"Se o desastre de Fukushima demostrou algo é que a enerxía nuclear é demasiado perigosa e cara para que se continúe usando", explican. "Non podemos permitir que estes accidentes volvan ocorrer, mais os oligopolios da electricidade seguen promovendo e utilizando a enerxía nuclear. Valoran máis os seus beneficios que o medio ambiente ou a seguridade das persoas", denuncian dende Ecoloxistas en Acción. Así, cada 11 de marzo, miles de persoas en todo o mundo únense para mostrar que non necesitamos a enerxía nuclear para vivir.
