Por X.M. Fernández | Allariz | 14/03/2022 | Actualizada ás 21:35
O Concello de Allariz dá un paso máis na súa firme aposta pola economía circular e polo respecto co Medio Ambiente formando parte da "Rede de Municipios por la Agroecología". A súa benvida a este colectivo é posible polas políticas medioambientais que o concello ourensán leva posto en marcha estes anos, iniciativas acordes con esta filosofía coma son: o Mercado da Reserva da Biosfera, o proxecto de gandería en extensivo local de Carne de boi de Allariz ou o programa Re de reutilización e reciclaxe.
Ademais destas políticas públicas, cómpre salientar outras iniciativas privadas que se desenvolven no concello en colaboración coa administración local, coma por exemplo: o centro de Educación Medioambiental do Rexo co seu queixo de ovella, a cooperativa Ecoleía de leite ecolóxico, Petelo, a produción de fariña de castaña e transformados, Mimá horta ecolóxica con tracción animal, Xabóns de leite de burra (asociación Andrea)...
A REDE DE MUNICIPIOS POLA AGROECOLOXÍA
O colectivo preséntase coma un lugar de encontro entre o persoal técnico e os responsables municipais, movementos sociais e os propios produtores, todos comprometidos co dereito á alimentación e á recuperación dun modelo agroalimentario produtivo e sostible co entorno, de vital importancia no momento no que nos atopamos.
O compromiso do Concello de Allariz cos produtores locais de proximidade que poden achegar aos mercados produto de calidade con canles curtas de distribución quedou de manifesto unha vez máis a pasada semana coa participación do concelleiro de Medio Ambiente, Bernardo Varela, nun interesante encontro virtual sobre agroecoloxía. O responsable local foi un dos intervintes no webinario, "Mercados agroecoloxicos explorando na coxestión", compartindo experiencias cos municipios de Valladolid, Zaragoza, León e tamén coa rede de mercados da Deputación de Barcelona.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.