Pimentos de Padrón: uns pican e outros non

Chama a atención á entrada de Herbón, que é a parroquia padronesa na que se cultivan os famosos "Pementos de Padrón", a carón da propia estrada xeral, a plena luz e ben visible, ver este invernadoiro que por mor dos temporais foi perdendo a súa pel plástica, deixando entrever que tras dela hai unha construción de ladrillo.

Por Paisaxe Maltratada - Carlos Coto | Rianxo | 30/05/2014

Invernadoiro en Padrón

Poderíase definir tamén como "de invernadoiro a galpón, en dous pasos". Revela unha ilegalidade consentida, xa que os seus propietarios foron construíndo no interior do invernadoiro paredes de ladrillo, perdendo a súa función como invernadoiro e converténdoo en galpón, almacén, pendello.

Revélanos tamén que a Disciplina Urbanística é inexistente, por parte do Concello, que ben fai a vista gorda, ben non saen dos despachos. Tamén dá a comprender o consentimento ou aceptación dos veciños, que consenten este tipo de aberracións.

Non ten solución digna máis que o seu derrubamento. Resulta penoso que tratemos de exportar produtos exclusivos e de excelencia cultivados nunha contorna tan degradada.

Carlos Coto

Nacido na Estrada, resido actualmente en Rianxo. Arquitecto dende 1988 con especialización en rehabilitación e Urbanismo. Como profesional liberal realicei edificios en Galicia, Cantabria, Euskadi, Portugal, Italia e Madrid. Ademais fun secretario técnico do COAG, arquitecto municipal de A Pobra e actualmente director da Oficina de Rehabilitación de Rianxo. Defendo o Urbanismo Sustentábel, a Ordenación Racional do Territorio, a Arquitectura Tradicional e loito contra o Maltrato da Paisaxe, do Territorio e do Patrimonio, eido, no que levo 30 anos loitando e impartindo moitas conferencias ao respecto.