As paredes dos colexios vólvense árbores: unha iniciativa para achegar o ecoloxismo á rapazada
Uns 50 centros participan nunha iniciativa de artes plásticas que emprega pintura capaz de purificar o aire.
Por E.P. | SANTIAGO DE COMPOSTELA | 16/03/2022 | Actualizada ás 19:24
As paredes e muros duns 50 centros educativos de toda Galicia converteranse en "árbores" grazas a unha iniciativa de Afundación que fará que unhas 4.000 nenas e nenos coloreen murais nos seus colexios e institutos que contribuirán a purificar o aire grazas ao emprego de pinturas especiais.
A actividade 'Plantando árbores con pinceis', impulsada pola obra social de Abanca en colaboración con Vella Escola, foi presentada este mércores no CEIP Rosalía de Castro de Lugo, un dos centros que participan nun proxecto posto en marcha en 2021 e que este ano ten previsto chegar a 50 centros nos que se decorarán 700 metros cadrados de paredes e muros.
Ao longo da mañá deste mércores, os alumnos de 6º de Primaria do centro lugués, guiados polo artista e coordinador do programa, David Brey Vázquez; colaboraron no pintado dun mural composto a través das ideas achegadas pola propia rapazada nunha fase inicial na que trazan os esbozos sobre os que se asentará o deseño final.
"UN METRO CADRADO, UNHA ÁRBORE"
A principal característica do proxecto é a pintura que se usa para decorar as parades e muros dos centros. Empréganse pigmentos de última xeración capaces de empregar a enerxía da luz, ben solar ou artificial, para eliminar compostos contaminantes e nocivos no ambiente a través dunha reacción coñecida como fotocatálise.
Así, coa combinación de dióxido de titanio, osíxeno e luz prodúcese un proceso de oxidación que depura o aire. "A fotocatálise non usa procesos químicos, senón físicos. Cada metro cadrado pintado con estas pinturas equivale en conversión de CO2 a unha árbore en idade adulta", explicou Marité Cores, que puxo o acento en que o obxectivo é "ir enchendo" os centros de Galicia "de pequenos bosques" actuando sobre os muros dos edificios educativos.
"MÁIS BICI E CAMIÑAR; E MENOS COCHE"
"Paréceme que é moi necesario que fagamos unha reflexión sobre o que está a pasar agora coa contaminación", resume Diego, un dos alumnos que participaron na actividade este mércores. "Hai que reducir a pegada de carbono e non tirar plástico", engaden dous dos seus compañeiros, aos que se suma Sofía, que receita "máis bicicleta e camiñar e menos coche".
"Temos unha gran responsabilidade os adultos sobre o que lle imos a deixar a estes nenos. Moitas veces dannos eles leccións sobre o que teñen que ser as cousas", sentenciou a directora do CEIP Rosalía de Castro de Lugo.
