Pintar o vento
Nos anos 90, na miña cafetería favorita en Compostela, a Airas Nunes que está moi próxima á Catedral, cheguei a coñecer a daquela realmente magnífica revista británica chamada Independent on Sunday. Nela, vin un día un detalle sorprendente ao cal a publicación non lle daba importancia: un artista lograra pintar o vento.
Por Ramón Torrado | Ribeira | 19/03/2022
Veñen á mente algunhas cancións que mencionan o vento:
BOB DYLAN – Blowin’ In The Wind
BOB SEGER – Against The Wind
BRYAN FERRY - Windswept
CAMILO SESTO – Con el viento a tu favor
CHRISTOPHER CROSS – Ride Like The Wind
FRANCO BATTIATO – Vento caldo
GEORGE MICHAEL – Wild Is The Wind
JIMI HENDRIX – The Wind Cries Mary
KING CRIMSON – I Talk To The Wind
LA DAMA SE ESCONDE – Coge el viento
MANU CHAO – El viento
NOIR DESIR – Le vent nous portera
SCORPIONS – Wind Of Change
THOMAS DOLBY – Windpower
Como na canción dos Scorpions, hai un sentimento cada vez máis poderoso que consiste en anhelar un vento que traia cambios. Que fuxan os ventos malos e que veña un céfiro suave e mesmo pracenteiro que marque a paz no mundo. É preciso que – a falta talvez de grandes estadistas – interveñan mentes brillantes do mundo a salvar o presente e o futuro.
Na India e na China e en toda Asia, en África e nas Américas, en Europa e en Oceanía, os seres humanos deberán mostrar o mellor de si mesmos para coordinar o benestar da Humanidade enteira. O reparto de alimentos, a distribución de vivendas e traballos, a investigación científica, as medidas ecolóxicas, a cultura e a educación: todas estas parcelas terán que ser promocionadas para o ben común.
A luz creativa que nos distingue será como a do pouco coñecido pintor do cal lamento non lembrar o nome. Nunha esquina da revista aparecía o seu cadro campestre: unha casa solitaria, rodeada de árbores. Da cheminea sae fume torcido nun ángulo moi agudo a causa do vento invisible: é a solución que está aí e que temos que intentar ver.
Ramón Torrado Romero (Araño-Rianxo, 1966). Educado en Galicia, no País Vasco e nos Estados Unidos. Licenciado en Filoloxía Inglesa na USC, é profesor de instituto. Investigador rosaliano. Foi colaborador en Certo, xornal dixital de Barbanza. Ten escritas catro novelas, un libro de relatos e outro de viaxes, entre elas, Rebeca no val das sombras ardentes (Toxosoutos, 2018) e "Torino" (Axóuxere, 2021), a súa última obra publicada.
