Por Europa Press / Redacción | SANTIAGO DE COMPOSTELA | 29/03/2022 | Actualizada ás 14:49
O Premio Nobel de Química 2021, David MacMillan, reivindicou este martes en Santiago de Compostela que "todos os países necesitan investir máis en ciencia e que ese investimento sexa diversa".
Unha reclamación que proclamou nun novo acto en Galicia, un lugar que definiu como "especial" e de "xente xenerosa". En parte por esa boa valoración de Galicia e dos galegos, o escocés non dubidou en ensinar e compartir nun encontro cos medios de comunicación, na sede do reitorado da Universidade de Santiago de Compostela (USC), a medalla do Nobel.
Un detalle que tamén tivo coa corporación do Concello de Santiago, onde asinou no Libro de Honra do consistorio, e anteriormente este luns co alumnado do instituto Sánchez Cantón de Pontevedra, cos que charlou nun coloquio.
O científico da Universidade de Princeton, nacido en Bellshill (Escocia) en 1968, acompañado polo Catedrático do Departamento de Física Aplicada da USC, Jorge Mira e do director do Centro Singular de Investigación en Química Biolóxica e Materiais Moleculares (CiQUS), José Luís Mascareñas, explicou aos presentes o descubrimento que lle levou a alzarse co galardón internacional: a organocatálise asimétrica, unha terceira vía de catalizadores baseada en pequenas moléculas orgánicas.
Xunto a Benjamin List, MacMillan descubriu que, ademais das encimas e dos metais, a catálise poderíase realizar mediante compostos que non levan metais, o que supuxo a revelación dun método "máis verde". Así, determinadas sustancias químicas convértense en produtos moito máis valiosos, tanto medioambientalmente falando como no ámbito económico, ademais de ter unha enorme relevancia a nivel industrial, "sobre todo para a industria farmacéutica".
MACMILLAN, UNHA PERSOA "NORMAL"
Os acompañantes do Nobel este martes, Jorge Mira e José Luís Mascareñas, definírono como un científico "excepcional" e unha persoa "moi próxima". Algo que o director do CiQUS resumiu, entre risas, en "unha persoa normal".
Así mesmo, contou que lle encanta o viño galego e, aínda que recoñeceu que, a pesar de levar xa máis tempo en Estados Unidos que en Escocia, séguese sentindo "moi escocés" e o seu corazón está cos Rangers, club de fútbol de Glasgow.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.