A relación entre o termalismo e os Camiños de Santiago analizada nun libro do profesor emérito Juan Gestal

"É indiscutible a relación entre as augas termais e o Camiño de Santiago". Así o afirma o profesor emérito da USC Juan Gestal no prólogo do libro 'Balnearios nos Camiños de Santiago en Galicia', publicación que xorde ao amparo da Cátedra de Hidroloxía Médica USC-Balnearios de Galicia e que profunda na relación entre o termalismo e os Camiños, a súa riqueza cultural e gastronómica.

A presentación deste libro, que tivo lugar en Santiago de Compostela este luns, serviu tamén para conmemorar o décimo aniversario desta Cátedra institucional da Universidade de Santiago de Compostela (USC).

O acto contou coa intervención do reitor Antonio López, o vicepresidente primeiro da Xunta, Alfonso Rueda; o profesor emérito da USC e director da Cátedra impulsora do volume, Juan Gestal; e Antonio Couto Rego de Edicións Bolanda.

Antonio López puxo o foco en como esta obra serve para "pór en valor os balnearios e a hidroterapia, algo que é consustancial á realidade de Galicia, ademais de ter unha proxección económica, social e cultural".

"O termalismo, do mesmo xeito que o Camiño de Santiago, constitúe un importante patrimonio europeo a cuxo abrigo se impulsaron localidades como Caldas de Reis, Mondariz, Baños de Molgas ou A Toxa, e deu fama a outras como O Carballiño ou Tui", incidiu o profesor Gestal.

"Poderiamos viaxar por esa Europa Termal descubrindo o seu importante papel histórico e cultural no nacemento e desenvolvemento do turismo ao longo dos séculos XVIII e XIX, e na dinamización socio-económica das comarcas onde se sitúan balnearios e como estes contribúen á conservación e valorización ambiental das súas contornas", engadiu o profesor emérito da USC.

DÚAS FORTALEZAS DO TURISMO GALEGO

Pola súa banda, Rueda definiu o Camiño de Santiago e o termalismo como "dous das fortalezas do turismo galego" que distinguen á comunidade como "un destino seguro, de calidade e sustentable e, en definitiva, un destino único que permite que Galicia estea de moda".

Por iso, salientou que ambos os recursos teñen un papel crave neste Xacobeo 21-22 para contribuír á reactivación do turismo galego porque, en conxunto, outorgan un plus para atraer visitantes que están a buscar tras a pandemia do coronavirus gozar de propostas pouco masificadas vinculadas coa natureza e os espazos abertos ou a saúde.

Rueda lembrou que a Xunta apoia desde 2014 a actividade de investigación e de divulgación no ámbito termal que leva a cabo a Cátedra de Hidroloxía Médica da USC cunha achega anual de 40.000 euros. Esta colaboración supuxo un investimento nos últimos anos de máis de 350.000 euros e acaba de renovarse ata 2025.

Ademais de dar resposta ás demandas actuais dos viaxeiros, Alfonso Rueda engadiu que o termalismo e o Camiño de Santiago son dous produtos turísticos que axudan a conformar unha oferta turística diferenciada. No caso do turismo termal, explicou tamén que permite avanzar na desestacionalización e creación de novas experiencias turísticas, ademais de apostar por un viaxeiro cun maior valor engadido.

Galicia é a primeira potencia termal de España cunha vintena de centros de balneoterapia e case 3.000 prazas, polo que este sector --explicou-- axuda a consolidar Galicia como "destino de calidade", xa que case o 70% dos establecementos deste tipo son de alta gama e a comunidade galega tamén lidera o ranking de balnearios con Q de calidade turística, con seis dos 26 de toda España.

Presentación de 'Balnearios nos Camiños de Santiago de Galicia'.. XOÁN CRESPO/XUNTA / Europa Press