Socialistas galegos e cataláns abren "liñas de colaboración" e enxalzan o ideario federal
Valentín González Formoso Salvador Illa acordaron compartir propostas de acción política e social e redactaron un documento conxunto 'Por unha España plural'.
Por Europa Press / Redacción | SANTIAGO DE COMPOSTELA | 20/04/2022 | Actualizada ás 19:19
O secretario xeral do PSdeG, Valentín González Formoso, e o primeiro secretario do PSC, Salvador Illa, acordaron abrir unha liña de colaboración entre ambas as formacións políticas para compartir o ideario e as liñas de acción política e social. Así o sinalaron ambos os dirixentes nun encontro de traballo este mércores en Santiago de Compostela, no que acordaron un documento conxunto 'Por unha España plural'.
Nunha rolda de prensa conxunta, o líder dos socialistas galegos enxalzou o ideario federal socialista "posto en dúbida tanto polos secesionistas e rupturistas", que "prefiren as vías unilaterais; "como pola dereita e a extrema dereita, que propoñen a desaparición dun sistema que permite conciliar a identidade territorial e os sistemas culturais cun encaixe nun Estado forte".
Socialistas galegos e cataláns "compartimos visión de país e da organización", indicou Formoso, que sinalou que este mércores inician unha etapa de "diálogo para falar dos problemas da cidadanía, da economía, da empresa, sociais e culturais". Así, PSdeG e PSC compartirán iniciativa e experiencias políticas "nun momento de crise económica e social provocada pola invasión de Putin sobre Ucraína".
O xefe de filas do PSdeG advertiu que, o momento actual, "require dunha visión máis construtiva por parte das formacións políticas e do compromiso das formacións co seu país".
SALVADOR ILLA
Pola súa banda, o responsable do PSC, Salvador Illa, destacou as coincidencias entre as dúas organizacións, particularmente no feito de que España "atopa fortaleza no recoñecemento da diversidade e da pluralidade". Tanto Galicia como Cataluña, engadiu, comparten o carácter territorial histórico, a lingua propia e características propias do ámbito periférico de España.
Ademais, o dirixente catalán incidiu na fortaleza municipal dos socialistas galegos, ao destacar que gobernan tres das catro deputacións provinciais, 111 alcaldías que representan o 65 por cento da poboación galega, incluíndo cinco das sete grandes cidades e máis de 1.000 edís.
DOCUMENTO CONXUNTO
Do encontro de ambos os dirixentes saíu un documento conxunto no que o PSdeG aposta por unha España plural, na que o autogoberno de Galicia se inscriba nun Estado forte que fomente a convivencia e o recoñecemento da diversidade.
"O PSdeG reafírmase como unha organización galega que forma parte do proxecto federal do PSOE e, nese proxecto, compartimos cos socialistas de Cataluña a aposta por unha España plural, diversa e integradora, sendo defensores claros dun modelo federal, como é o Estado das Autonomías, que contribuíu ao desenvolvemento económico e social de Galicia de forma notable", sinala o texto.
O documento deixa claro que os socialistas non están "nin nas posicións daqueles que defenden a secesión, o independentismo, a autarquía ou simplemente non recoñecen as bondades de organizacións internaciones (UE, NATO, ONU, etc.) e se poñen de perfil ante a invasión de Ucraína" nin tampouco están "nas posicións dos que reivindican un Estado sen autonomías, nin autogoberno, que son nostálxicos do estado unitario predemocrático".
