Máis de 12.000 aspirantes están convocados á oposición de varias categorías do Sergas do 7 ao 15 de maio
As probas realizaranse en Silleda, no recinto da Feira Internacional de Galicia.
Por E.P. | SANTIAGO DE COMPOSTELA | 26/04/2022 | Actualizada ás 16:13
Un total de 12.279 persoas aspirantes foron convocadas aos exercicios da oposición para o ingreso de varias categorías de persoal estatutario do Servizo Galego de Saúde (SERGAS) os días 7,8, 14 e 15 de maio no recinto da Feira Internacional de Galicia no municipio de Silleda.
Así o informou a Consellería de Sanidade nun comunicado de prensa por mor de que este martes o Diario Oficial de Galicia (DOG) publica a data e hora de realización dos exercicios da fase de oposición dos procesos selectivos para o acceso a varias categorías.
En concreto trátase das de calefactor, cociñeiro, condutor, electricista, lavandero, logopeda, mecánico, planchador, técnico especialista en sistemas e tecnoloxías da información, técnico superior en sistemas e tecnoloxías da información, técnico de xestión de sistemas e tecnoloxías da información, pique, telefonista, terapeuta ocupacional e traballador social.
Máis dun sete por cento das persoas aspirantes inscritas acceden pola quenda de discapacidade e case un 2% polo de promoción interna, concreta Sanidade.
O sábado 7 de maio ás 9,30 horas en Silleda están convocadas 347 persoas da categoría de condutor para 12 prazas ofertadas. Esa mesma xornada ás 16,00 horas foron citados 4.763 aspirantes a pique para cubrir 239 prazas.
O domingo 8 de maio en quenda de mañá ás 9,30 horas foron convocados 1.602 aspirantes a 91 prazas ofertadas nas categorías de calefactor (37), logopeda (4), técnico superior de sistemas e tecnoloxías da información (4) e traballador social (46).
Ás 16,00 horas dese día 8 están citadas 928 persoas das categorías de técnico de xestión de sistemas e tecnoloxías da información e lavandero, para cubrir oito e 39 prazas, respectivamente.
MÁIS PROBAS
O sábado 14 de maio ás 9,30 horas están convocados 1.123 aspirantes para 54 prazas das categorías de cociñeiro (24), mecánico (19) e terapeuta ocupacional (11), e ás 16,00 horas foron citados 1.564 aspirantes a telefonista para 33 prazas ofertadas.
Finalmente, o 15 de maio en quenda de mañá están chamados 786 aspirantes da categoría de electricista para cubrir 38 prazas. E ás 16,00 horas están citadas 856 persoas de planchador (47 prazas) e técnico especialista de sistemas e tecnoloxías da información (12 prazas).
