Por Europa Press / Redacción | SANTIAGO DE COMPOSTELA | 29/04/2022 | Actualizada ás 10:34
As queimas agrícolas e forestais realizadas por particulares quedan prohibidas "desde este momento e ata novo aviso" debido ás potenciais complicacións derivadas das condicións climatolóxicas.
A Consellería do Medio Rural comunicou este venres que xa non se darán máis permisos e os xa concedidos quedarán en suspenso a partir deste momento. Só quedan excluídas desta prohibición as queimas controladas que executa o Servizo de prevención e defensa contra os incendios forestais debidamente planificadas e dispondo dos medios de extinción precisos.
Así mesmo, a Xunta informou de que toma esta decisión tras avaliar a evolución da situación meteorolóxica e "unha vez analizados polo miúdo os diferentes indicadores técnicos que inciden no risco de lume".
Neste sentido, tamén argumentou que a normativa -Decreto 105/2006, polo que se regulan medidas relativas á prevención de incendios forestais, á protección dos asentamentos no medio rural e á regulación de aproveitamentos e repoboación forestal- prohibe as queimas en canto as condicións meteorolóxicas poidan dificultar o seu control.
Nesta mesma liña, a Consellería do Medio Rural pediu colaboración da cidadanía para que extreme as precaucións e denuncie calquera actividade delituosa incendiaria da que teña coñecemento. Ademais, o departamento que dirixe José González lembrou que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.