Sobe a tarifa mínima dos taxis 30 céntimos ante as denucias de "falta de transparencia"
A Unión de Consumidores de Galicia denuncia "subidas encubertas".
Por Europa Press / Redacción | SANTIAGO DE COMPOSTELA | 06/05/2022 | Actualizada ás 14:05
O Diario Oficial de Galicia recolle este venres modificacións no réxime de tarifas que se aplica nos servizos de taxi de carácter interurbano que establece, entre outros cambios, unha tarifa mínima de 3,60 euros e os metros percorridos en cada salto de paso do taxímetro en 41,67, no servizo diúrno.
Coa anterior normativa, efectuada pola Resolución de 10 de decembro de 2013, da Dirección Xeral de Mobilidade, a percepción mínima era de 3,30 euros e o salto de paso do taxímetro de 45,45 metros. O que si se mantén é o paso do taxímetro en 0,05 céntimos.
Ademais, os servizos prestados de luns a sábado laborables, entre as 6,00 horas e as 22,00 horas, manteñen o primeiro salto nos tres quilómetros e o tempo para este establécese nos 743 segundos, fronte aos 815,37 anteriores.
Estas novas tarifas establecen cambios tamén na hora de espera dos vehículos que non dispoñan de taxímetro, que pasa dos 14,57 euros a 16 e o prezo por quilómetro percorrido sobe 10 céntimos, de 1,10 euros a 1,20.
Por outra banda, os domingos e festivos terán un incremento do 20% respecto das tarifas anteriores: o mínimo de percepción establécese en 4,32 euros, o prezo por quilómetro percorrido en 1,44 euros e o prezo por hora de espera 19,20 euros. Ademais, o salto de paso do taxímetro sitúase nos 34,72 metros.
CRÍTICA DA UNIÓN DE CONSUMIDORES
Ante esta nova tarifa, a Unión de Consumidores de Galicia denunciou "subidas encubertas" e criticou que o sector, "co visto e prace da administración e empresarios", defenda unhas tarifas que, ao seu xuízo, carecen de falta de transparencia e "insultan a intelixencia das persoas consumidoras".
Neste sentido, nunha nota de prensa, sinalou que, a pesar de que o paso do taxímetro mantense en 5 céntimos, "o máis importante do importe que finalmente paga a persoa usuaria increméntase en máis dun 14%" ao diminuír a 41,67 os metros percorridos en cada paso do taxímetro.
Ademais, censurou que as tarifas teñen como base do seu cambio cuantitativo "a moda de reducir o número de unidades de servizo trasladando á cidadanía unha falsa aparencia de mantemento de prezos ou subida lixeira" pero, engadiu, "en realidade os incrementos son moi superiores".
Nesta mesma liña, destacou que o sector do taxi da Coruña xa levara á comisión de prezos de Galicia a súa proposta de "subida encuberta de prezos" de "máis dun 9% no servizo diúrno e de máis dun 11% no servizo nocturno". Unha tarifa que, segundo a Unión de Consumidores de Galicia, "presumiblemente imitarán outros concellos galegos, xa que é habitual que o sector traballe ao máis puro estilo copia pega".
