Baltar xustifica o apoio a Jácome: "o empurrón foi intolerable, pero a cidade non pode parar"
"Estamos no goberno de Ourense con independencia de que o alcalde sexa Gonzalo Pérez Jácome ou non", apuntou o presidente da Deputación.
- Baltar subliña que Jácome debe pedir perdón e di que é "mil veces mellor alcalde que Villarino"
- O empurrón de Jácome volve abrir a porta a unha moción de censura en Ourense
Por Europa Press / Redacción | SANTIAGO DE COMPOSTELA | 10/05/2022 | Actualizada ás 12:19
O presidente da Deputación de Ourense e do PP nesta provincia, Manuel Baltar, defendeu a presenza desta formación no goberno municipal da cidade das Burgas, ao ser preguntado de novo se seguen apoiando ao alcalde, Gonzalo Pérez Jácome, tras o empuxón a unha sindicalista no arranque da folga do transporte urbano.
"Estamos no goberno de Ourense con independencia de que o alcalde sexa Gonzalo Pérez Jácome ou non, é o goberno que xestiona os intereses da cidade de Ourense", dixo, a preguntas dos xornalistas, coincidindo coa súa presenza nun foro económico na cidade herculina.
Sobre o comportamento do rexedor, considerou que debe pedir desculpas, pero apostilou que facelo é unha "cuestión persoal". Do mesmo, manifestou que é "intolerable e inxustificable" e que é algo "reprochable", pero incidiu en que o goberno local non pode "parar".
"Nós --o PP-- temos dúas opcións, estar na oposición clamando, insultando, ou xestionar os intereses da cidade que é para o que nos presentamos", recalcou Baltar, convencido de que a experiencia de "estes meses de mandato" servirá para que en 2023 haxa un alcalde ou alcaldesa do PP.
