Alfonso Rueda avanza a súa disposición a recibir aos líderes do BNG e do PSdeG

O presidente da Xunta de Galicia, Alfonso Rueda, avanzou este mércores a súa disposición a reunirse coa líder do BNG, Ana Pontón, e co secretario xeral do PSdeG, Valentín González Formoso.

Así o anunciou na sesión de control da Cámara galega, a primeira que afronta desde que foi investido presidente da Xunta de Galicia tras a marcha de Alberto Núñez Feijóo para liderar o PPdeG.

Na sesión, o portavoz parlamentario do PSdeG, Luís Álvarez, volveu reclamar ao titular da Xunta que recibise ao novo secretario xeral do PSdeG, Valentín González Formoso, quen non foi recibido por Feijóo desde a súa elección como xefe de filas dos socialistas galegos.

Tras iso e en resposta á pregunta formulada pola nacionalista Ana Pontón, Rueda trasladou a súa disposición a manter un encontro tanto co líder do PSdeG como coa portavoz nacional do BNG.

"Adianto que, por suposto, se vostedes mo piden entendo que vostede nos deberes que me puxo, pídenme que a reciba --en referencia a Ana Pontón--, fareino; e se o líder do Partido Socialista mo pide, tamén o farei", sinalou. "É o meu deber nese espírito institucional", apuntou.

Rueda, tras o Consello da Xunta.. Xunta de Galicia