Por Europa Press / Redacción | SANTIAGO DE COMPOSTELA | 09/06/2022 | Actualizada ás 14:59
Renfe, a Axencia de Turismo de Galicia e o Instituto Ourensán de Desenvolvemento Económico (Inorde) presentaron este xoves a novena tempada dos Trens Turísticos de Galicia, que este ano incorporan dous novos percorridos: a 'Ruta dos Queixos de Galicia' e a 'Ruta das Mariñas'.
A iniciativa, en marcha desde 2013, suma así un total de 13 itinerarios. Destacan que os prezos se manteñen desde 2019: 45 euros para adultos e 20 euros para rapazada por ruta. Ademais, as persoas usuarias poden beneficiarse do "Galicia Rail Pass", un abono para percorrer Galicia durante tres días consecutivos. As condicións poden consultarse aquí.
O Executivo explica nun comunicado que "os bos datos obtidos na pasada edición", cando se pechou a campaña cunha ocupación do 97,5%, fan que neste ano se incrementase tanto o número de saídas, de 22 en 2021 a 37 en 2022 --un incremento do 59%--; así como o número de prazas, que crece un 76%, pasando de 1.532 a 2.696asentos.
No que respecta ás novidades, a 'Ruta dos Queixos de Galicia' percorre tres das catro denominacións de orixe galegas. En primeiro lugar, en Sobrado dos Monxes, visitarase a Casa do Queixo, con degustación dos queixos de Teto e Arzúa-Ulloa. A seguinte parada será a queixería Don Crisanto, en Vilalba, co seu queixo San Simón da Costa. Tras o xantar (libre) en Lugo coñecerase o proxecto de ecoagroturismo de Arqueixal, en Albá (Palas de Rei), co queixo Arzúa-Ulloa como produto estrela.
Pola súa banda, a 'Ruta das Mariñas' levará os viaxeiros desde A Coruña ata Ferrol polas Mariñas e Terras do Mandeo, reserva da Biosfera. A primeira parada será Betanzos, e a continuación, en Paderne, visitaranse as instalacións de Orballo, que conta coa única plantación de té da Europa continental. O tren pasará por Pontedeume e finalizará en Ferrol, cun paseo en barco pola súa ría, defendida polos castelos da Palma e San Felipe, e un paseo polo barrio da Madalena, do período da Ilustración.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.