O IPC dispárase en Galicia un 9,6% en maio, case un punto por encima que a media estatal
No que vai de ano, os prezos incrementáronse en Galicia un 4,9%.
Por Europa Press / Redacción | VIGO | 10/06/2022 | Actualizada ás 10:08
O Índice de Prezos de Consumo (IPC) subiu un 1,1% en maio respecto de abril e incrementou a súa taxa interanual cinco décimas, ata o 9,6%, polo encarecemento das gasolinas, dos alimentos e da restauración.
Segundo datos publicados este venres polo Instituto Nacional de Estatística (INE), recollidos por Europa Press, o IPC disparouse en Galicia ata nove décimas por encima que no total de España, xa que a nivel estatal creceu un 8,7%.
No que vai de ano, os prezos incrementáronse en Galicia un 4,9%. Por grupos, os alimentos e bebidas non alcohólicas incrementaron o seu prezo un 1,7% no último mes e un 10,9% desde maio de 2021. A vivenda encareceuse un 21,8% nos últimos doce meses, aínda que entre abril e maio caeu un 0,8%.
O transporte foi outro dos grupos que máis se encareceu, cun +15% desde maio do ano pasado e un +2,9% no último mes. Tamén os hoteis, cafés e restaurantes dispararon os seus prezos un 7,7% no último ano e un 1,1% de abril a maio. O único grupo que baixou os seus prezos foron as comunicacións, baixando un 0,1% de abril a maio e un 0,2% nos últimos 12 meses.
MEDIDAS
Pola súa banda, a vicepresidenta primeira do Goberno e ministra de Asuntos Económicos e para a Transformación Dixital, Nadia Calviño, asegurou este venres que as medidas que adoptou o Executivo para amortecer a subida de prezos, como a baixada da gasolina e da electricidade, axudaron a reducir o IPC entre dous e tres puntos, e non descartou adoptar medidas "adicionais" para seguir recortando a inflación.
"Imos estender as medidas mentres sexa necesario e, por outra banda, imos ver se é necesario tomar medidas complementarias ou axustalas, de maneira que sexan o máis eficaces posibles e que podamos seguir amortecendo o impacto e canto antes iniciar unha senda de desaceleración da inflación", subliñou Calviño en declaracións á Televisión de Galicia recollidas por Europa Press.
Calviño afirmou que as medidas postas en marcha polo Goberno para amortecer o impacto da inflación "funcionan", pois en termos harmonizados, España ten unha alza de prezos inferior á de países como Alemaña, Holanda e Bélxica. "Hai máis de dez países europeos que están por encima de España en termos de inflación", resaltou.
