Volve a normalidade para as festas do San Xoán en Galicia con fogueiras en praias e outros espazos
Na Coruña, unha vez pasada a festa, as praias deberán quedar libres ao seis da madrugada do 24 de xuño, día no que xa se permitirá o baño a partir do nove da mañá.
Por Europa Press / Redacción | SANTIAGO DE COMPOSTELA | 19/06/2022 | Actualizada ás 14:09
A tradicional festa de San Xoán recuperará este ano a normalidade, tras os condicionantes impostos pola pandemia, coa posibilidade de facelas xa nas praias e con propostas como 'puntos violeta' para prestar asesoramento e asistencia en casos de posible violencia machista.
Este é o caso da Coruña, cidade na que esta festa reunía antes da pandemia a miles de persoas nas praias, algo que se espera repetir este ano. Nelas, de acordo co anunciado polo consistorio, non haberá restricións pola Covid, aínda que si a imposibilidade de acceder a algunhas delas como as das Lapas, Adormideiras e Bens, que permanecerán pechadas.
Un total de 662 persoas conformarán o dispositivo de vixilancia, asistencia e emerxencias posto en marcha polo goberno local con motivo da celebración do San Xoán e nunha xornada na que se distribuirán 120.000 toneladas de madeira horas antes de que empece esta máxica noite.
Unha vez pasada a festa, as praias deberán quedar libres ás seis da madrugada do 24 de xuño, día no que xa se permitirá o baño a partir do nove da mañá. O baño estará prohibido desde o día 23, ao dez da noite. Haberá tamén cámaras de seguridade e outra de visión térmica, que permitirá detectar a entrada de persoas no mar en horario nocturno.
Sobre as normas, sardiñadas e churrascadas estarán permitidas sen necesidade de comunicación as que non ocupen calzadas nin entorpezan a circulación. O serán entre as 13,00 e 16,00 horas e as 20,00 e as doce da noite, cumprindo as medidas de seguridade. As que ocupen calzada poderán realizarse previa comunicación.
O material poderá baixarse ás praias a partir das 19,30 horas e a repartición da madeira será media hora antes. Por outra banda, previa solicitude, os establecementos de hostalaría poderán ampliar o seu horario dúas horas máis.
SOLICITUDES
En Santiago, xa acabou o prazo para solicitar a realización de fogueiras ou sardiñadas en espazos públicos, aínda que se manterá ata o día 22 para facelo en terreos privados. Todos os concellos consultados coinciden na necesidade de pedir estes permisos e en que, tras dous anos de pandemia, non haberá restricións.
Os prazos para estas peticións varían en función de cada municipio e tamén onde se poden facer. Así, en Ferrol quedan prohibidas en terreos de dominio público as fogueiras, que volven tamén a Lugo, cidade na que tanto organizacións como particulares terán de prazo ata o 23 de xuño para solicitar poder realizar unha. "Igual que antes", sinalaron a Europa Press desde Pontevedra en canto ao formato e en referencia á habitual celebración do San Xoán antes da pandemia.
No municipio coruñés de Carballo, tamén con gran tradición desta celebración, contarán coa presenza do grupo Tanxugueiras o 24 de xuño. Ata o día 20 terán aberto, ademais, o prazo para participar no 'concurso de cachelas', con premios que irán entre os 600 e os 150 euros. Tamén nesta localidade, como ocorre noutras, haberá un reforzo policial e cambios no tráfico e os aparcadoiros.
En Oleiros, unha orquestra tocará na noite de San Xoán na praia de Bastiagueiro, con leña que se achegará de forma grautita aos veciños e cun dispositivo policial para evitar incidencias, como ocorrerá nos demais municipios. Nalgún concello como o de Ribeira optouse, mentres, por prohibir as fogueiras nos areais e para realizalo nas súas proximidades será necesario obter autorización.
RESPONSABILIDADE
Como ocorrerá noutras localidades, en Valga a petición dos permisos para as fogueiras manterase ata o 21 de xuño e o responsable da mesma deberá cubrir un impreso comprometéndose a adoptar as medidas de seguridade, unha seguridade na que inciden os concellos consultados.
E é que todos eles apelan á responsabilidade para evitar incidencias e tamén evitar o uso de produtos contaminantes, así como proceder á recollida de residuos que se poidan xerar. Por outra banda, as propostas musicais e as actividades previas a esta xornada festiva marcarán tamén unha celebración na que se espera unha gran afluencia de persoas dado o contexto de restricións que houbo nas anteriores celebracións pola pandemia.
