A Xunta censura que o Estado leve ao Supremo o plan de xestión do marisqueo de Galicia
A sentenza é "unha vitoria para o sector marisqueiro galego ante un ataque totalmente arbitrario" do Goberno central, di a directora xeral de Desenvolvemento Pesqueiro.
Por E.P. | SANTIAGO DE COMPOSTELA | 21/06/2022 | Actualizada ás 18:14
A Xunta censurou que o Estado recorrese ante o Tribunal Supremo a sentenza do Tribunal Superior de Xustiza de Galicia (TSXG) que dá a razón á Administración autonómica no conflito aberto polo plan galego para a xestión do marisqueo para o próximo trienio.
Así o manifestou a directora xeral de Desenvolvemento Pesqueiro, Susana Rodríguez, durante a súa intervención na Comisión 8ª de Pesca e Marisqueo do Parlamento de Galicia, onde respondeu a unha pregunta formulada polo Grupo Popular. Alí, incidiu en que o fallo do TSXG "ratifica un por un" os puntos defendidos polo Goberno galego e apoia a legalidade do Plan Xeral de Explotación Marisqueira para o período entre 2021 e 2023.
Para Rodríguez, a sentenza é "unha vitoria para o sector marisqueiro galego ante un ataque totalmente arbitrario" do Goberno central, que "pon en risco" ás 9.000 persoas que se dedican a esta actividade en Galicia.
O Ministerio para a Transición Ecolóxica decidiu recorrer o plan de xestión do marisqueo elaborado pola Xunta ao entender que a Consellería do Mar necesita un informe de Costas para sacar adiante un documento deste tipo. Tras o fallo do TSXG que apoiou as teses da Xunta, será agora a quenda do Supremo dirimir se este documento é necesario ou non.
