Bruquetas (Reganosa) di que a merda do gando podería crear o 10% do biogás de Galicia
Conde apela a "acelerar" a aposta polo hidróxeno verde e a eólica mariña.
Por Europa Press / Redacción | SANTIAGO DE COMPOSTELA | 01/07/2022 | Actualizada ás 13:46
O director xeral de Reganosa, Emilio Bruquetas, demandou "pór en práctica políticas públicas a nivel nacional que incentiven a obtención de biogás", pois destaca que con "a reutilización de todas as defecacións gandeiras" que se producen en Galicia "poderíase xerar o 10% do gas que se consome en Galicia".
Así o expuxo nunha mesa redonda do III Xornada de Finanzas Sustentables, que organiza Abanca en Santiago, na que tamén participaron o vicepresidente económico da Xunta, Francisco Conde, e a conselleira de Desenvolvemento Económico do País Vasco, Arantxa Tapia.
Neste encontro, Bruquetas queixouse de que "non hai políticas claras de incentivos dese biogás" e apunta á "oportunidade" existente en Galicia neste ámbito, mentres destaca que o uso dese abono natural suporían a enerxía necesaria para a futura fábrica de fibras téxtiles que se proxecta en Palas.
Paralelamente, pediu unha planificación enerxética conxunta que permita aproveitar as potencialidades que existen, pois se queixa de que "non hai unha rede de gasodutos adecuada". Así mesmo, referiuse a diferentes proxectos de Reganosa aos que opta para a obtención de fondos Next Generation, que suporán "un antes e un despois" para a compañía, como a planta de hidróxeno que prevé para As Pontes. No entanto, criticou que troceen os Perte en "microproxectos" e haxa unha centralización de fondos.
GALICIA E PAÍS VASCO
Pola súa banda, o vicepresidente económico da Xunta, Francisco Conde, expresou que o hidróxeno verde e a eólica mariña son dúas dos principais obxectivos a "acelerar" no "curto prazo" no marco do pacto verde, do mesmo xeito que os biocombustibles e o autoconsumo.
Sinalou que o futuro dese pacto verde pasa pola colaboración público-privada, así como un papel activo da cidadanía no aforro e a eficiencia enerxéticos. Tamén lamentou que España vive "maiores tensións" que outros países nos que se vive unha transición enerxética "máis gradual". Ademais, censurou a xestión que realiza do Goberno central dos fondos Next Generation, o que está a facer que se estean "diluíndo como un azucarillo".
